នាវាចម្បាំងបំបាំងកាយ​របស់រុស្ស៊ី Admiral Flota Kasatonov បានបញ្ចប់ការធ្វើតេស្ត​របស់ខ្លួន​ ហើយមានគម្រោងដាក់ឲ្យប្រើប្រាស់​ក្នុងពេលឆាប់ៗខាងមុខនេះ នៅក្នុងជួរ​កងកម្លាំងទាហានជើងទឹករបស់ប្រទេសរុស្ស៊ី ។ 

ប្រភពព័ត៌មានរុស្ស៊ី​បានផ្សាយ​ កាលពីថ្ងៃទី​៨ ខែមិថុនា ឆ្នាំ២០២០ថា នាវាចម្បាំង Admiral Flota Kasatonov ត្រូវបានរចនាឡើង​ ដោយបច្ចេកវិទ្យាទំនើប អាចបំបាំងកាយ ​បាន​ និង​មានប្រសិទ្ធភាពប្រយុទ្ធ​ពហុគោលដៅ ក្នុងនោះដូចជាការរុករក និងប្រឆាំងនាវាមុជទឹក ប្រឆាំង​ទៅលើយន្តហោះចម្បាំង និងប្រឆាំងទៅលើប្រព័ន្ធមីស៊ីល​ការពារ​ផងដែរ ។ 

សេចក្តីថ្លែងការណ៍របស់​កម្លាំងជើងទឹករុស្ស៊ី​បញ្ជាក់ថា « ​នាវាចម្បាំង ២២៣៥០ «Admiral Flota Kasatonov» បានបញ្ចប់ការសាកល្បង​ដោយជោគជ័យ និងបានវិលត្រឡប់​ទៅកាន់​មូលដ្ឋាន​​ North Shipyard ។ ក្នុងខែមិថុនា នាវាចម្បាំង​មានការកែសម្រួល​​ ហើយបន្ទាប់មក​នឹងបញ្ជូន​ទៅកាន់​កងកម្លាំងជើងទឹក​រុស្ស៊ី​ ដើម្បីប្រើប្រាស់» ។ 

ប្រភពព័ត៌មានរុស្ស៊ី​ បានបញ្ជាក់ទៀតថា នាវាចម្បាំង Kasatonov នេះ ត្រូវបានបង្កើតឡើងជាមួយការបំពាក់បច្ចេកវិទ្យាបំបាំងកាយ គេចពីប្រព័ន្ធរ៉ាដារបស់សត្រូវ អំឡុងពេលមានសង្គ្រាម នៅតំបន់សមុទ្រឆ្ងាយៗ ។ នាវាចម្បាំងនេះ នឹងក្លាយជាផ្នែកមួយរបស់កងនាវាចរណ៍ភាគខាងជើងរុស្ស៊ី ។  

សូមបញ្ជាក់ថា នាវាចម្បាំងបំបាំងកាយរបស់រុស្ស៊ីនេះ បានចាប់ផ្តើមស្ថាបនាឡើង នៅថ្ងៃទី​២៦ ខែវិច្ឆិកា ឆ្នាំ២០០៩ ។ ការសាកល្បងដំបូង​ចាប់ផ្តើម​ នៅថ្ងៃទី១២ ខែធ្នូ ឆ្នាំ២០១៤ ។ នាវាចម្បាំងនេះផលិតឡើងដោយ​ក្រុមហ៊ុន Severnaya Verf មានទទឹង ១៦ម៉ែត្រ បណ្តោយ​១៣៥ម៉ែត្រ ទម្ងន់សរុប ៤ ០៨២​លានគីឡូក្រាម និងល្បឿន ៣៧​គីឡូម៉ែត្រ​ក្នុងមួយម៉ោង ៕ ប្រែសម្រួលដោយ៖ thach yat 

from： https://tnaot.com/km/m/detail/article/9347315