Sign In 
កម្លាំងប្រឆាំងបទល្មើសសេដ្ឋកិច្ចខេត្តកណ្តាល បានធ្វើការចុះបង្រ្កាបទីតាំងផលិតស្ករត្នោតមួយកន្លែង ដោយសម្រេចដកហូត ផលិតផលក្លែងក្លាយមួយចំនួន ដើម្បីទប់ស្កាត់ការចរាចរលក់នៅលើទីផ្សារ។
ការចុះបង្រ្កាបទីតាំងផលិតកែច្នៃស្ករត្នោតក្លែងក្លាយនេះ គឺបានធ្វើឡើង កាលពីថ្ងៃទី១៥ ខែសីហា ឆ្នាំ២០២០ ស្ថិតនៅភូមិរំលិច ឃុំទួលព្រិច ស្រុកអង្គស្នួល ខេត្តកណ្តាល។
មុនឈានដល់ការចុះបង្រ្កាបទីតាំងខាងលើនេះ ស្នងការរងទទួលផែនប្រឆាំងបទល្មើសសេដ្ឋកិច្ច បានចុះធ្វើការណែនាំម្ចាស់អាជីវកម្មជាច្រើនលើកច្រើនសារ ដោយហាមមិនឱ្យលួចលាក់ផលិតស្ករត្នោតក្លែងក្លាយជាបន្តទៀត រហូតមកដល់ពេលនេះ ទើបឈានដល់ការឃាត់ខ្លួនម្ចាស់អាជីវកម្ម ឈ្មោះ ជុន មុំ ភេទស្រី អាយុ៤៩ឆ្នាំ ព្រមទាំងធ្វើការរឹបអូសផលិតផលក្លែងក្លាយ ដែលបានផលិតបំរុងនឹងលក់នៅលើទីផ្សារ មួយចំនួនផងដែរ។
លោកឧត្តមសេនីយ៍ត្រី លី សុជាតិ ស្នងការរងទទួលផែនប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកណ្តាលបានឲ្យដឹងថា ម្ចាស់ទីតាំងមានមុខរបរផលិតកែច្នៃស្ករត្នោតក្លែងក្លាយ ធ្លាប់ត្រូវបានសមត្ថកិច្ច ធ្វើកិច្ចសន្យាអប់រំឱ្យបញ្ឈប់ផលិតស្ករត្នោតក្លែងក្លាយ ចំនួន៥លើករួចមកហើយ។
រហូតមកដល់ពេលនេះទើបសមត្ថកិច្ច ធ្វើការឃាត់ខ្លួន ម្ចាស់ទីតាំងខាង ដើម្បីចាត់វិធានការតាមផ្លូវច្បាប់៕ ដោយ៖ ត្នោត
