Sign In 
ប្រមុខរដ្ឋកូរ៉េខាងជើង បានព្រមានទៅកាន់បណ្តាមន្ត្រីទាំងអស់ មិនឲ្យទទួលជំនួយពីខាងក្រៅជាដាច់ខាត បើទោះជាប្រទេសខ្លួនកំពុងរងគ្រោះធ្ងន់ធ្ងរដោយសារទឹកជំនន់ បង្កដោយព្យុះភ្លៀងជាច្រើនថ្ងៃមកនេះក្តី។
ថ្លែងក្នុងកិច្ចប្រជុំបក្សពលករកូរ៉េ ដោយចេញផ្សាយលើកញ្ចក់ទូរទស្សន៍រដ្ឋកូរ៉េខាងជើង KCNA នៅថ្ងៃសុក្រនេះ លោក គីម ជុងអ៊ុន បានលើកឡើងថា បច្ចុប្បន្នកូរ៉េខាងជើង កំពុងរងគ្រោះធ្ងន់ធ្ងរដោយទឹកជំនន់បង្កដោយភ្លៀងភ្លាក់ជាច្រើនថ្ងៃជាប់គ្នា ប៉ុន្តែក៏មិនគួរបើកទ្វារទទួលជំនួយពីខាងក្រៅ ស្របពេលពិភពលោកកំពុងរាតត្បាតដោយជំងឺកូវិដ ១៩ នោះដែរ។
លោក គីម បន្តថា ស្ថានភាពរាតត្បាតកូវីដ ១៩ នៅពេលនេះ កំពុងតែធ្ងន់ធ្ងរខ្លាំងពាសពេញសាកលលោក ហេតុនេះការបិទព្រំដែនឲ្យជិត ជាវិធានការល្អបំផុតដើម្បីទប់ស្កាត់ ហើយបើទោះជានរណាក៏ដោយ ចង់ផ្តល់ជំនួយសម្រាប់សង្គ្រោះស្ថានភាពទឹកជំនន់ក្នុងប្រទេស ក៏មិនត្រូវទទួលនោះដែរ។ លោកថា អ្វីចាំបាច់បំផុតត្រូវធ្វើនៅពេលនេះ គឺជួយពលរដ្ឋរងគ្រោះដោយទឹកជំនន់ រកវិធានការស្រោចស្រង់ ក៏ដូចជាការពារគ្រោះធម្មជាតិដែលអាចនឹងឡើងវិញនាពេលអនាគត៕ ដោយ៖ ត្នោត
