កាលពីថ្ងៃព្រហស្បតិ៍អង្គការសិទ្ធមនុស្សអាស៊ីអាគ្នេយ៍បានស្នើឱ្យអាជ្ញាធរកម្ពុជាពន្យល់បកស្រាយអំពីការបាត់ខ្លួនសកម្មជនថៃដែលត្រូវគេនិរទេសខ្លួន ដោយហេតុថាសកម្មជននោះត្រូវខ្មាន់កាំភ្លើងចាប់ខ្លួននៅនឹងមុខផ្ទះល្វែងរបស់គេតែម្តងដែលមានទីតាំងនៅរាជធានីភ្នំពេញ។

សកម្មជនរូបនេះអាយុ ៣៧ ឆ្នាំ ឈ្មោះថា Wanchalerm Satsaksit ​ត្រូវបានគេចាប់ដាក់ក្នុងរថយន្តមួយ​ដោយបុរសខ្មាន់កាំភ្លើង​ ៤ ឬ ៥នាក់ ខណៈពេលដែលគាត់កំពុងដើរនៅតាមផ្លូវនៅមុខផ្ទះល្វែងរបស់គាត់ក្នុងរាជធានីភ្នំពេញ។ លោក Brad Adams នាយកអង្គការសិទិ្ធមនុស្សប្រចាំអាស៊ីបានមានប្រសាសន៍ថា ការចាប់សកម្មជននយោបាយថៃដែលកើតឡើង​ក្នុងទីក្រុងភ្នំពេញទាមទារឱ្យមានការឆ្លើយតបជាបន្ទាន់ពីខាងអាជ្ញាធរកម្ពុជា។ អ្នកនាំពាក្យ​អាជ្ញាធរកម្ពុជាបានប្រាប់​កាសែត Reuters ថាអាជ្ញាធរ​កម្ពុជា​មិនបានឃាត់ខ្លួនឬចាប់ខ្លួនសកម្មជនរូបនេះទេ ហើយក៏មិនមាន​ព័ត៌មានគ្រប់គ្រាន់សម្រាប់បើកការស៊ើបអង្កេតនោះទេ។ លោក Wanchalerm ស្ថិតក្នុងចំណោមសកម្មជនថៃដែលត្រូវនិរទេសខ្លួនចំនួន ២៩នាក់​ ត្រូវបានចោទប្រកាន់ពីបទរំលោភបំពានច្បាប់របស់ប្រទេសថៃ​ក្នុងមាត្រាទី ១១២ នៃក្រមព្រហ្មទណ្ឌ។ គាត់បានភៀសខ្លួនចេញពីប្រទេសថៃបន្ទាប់ពីរដ្ឋប្រហារក្នុងឆ្នាំ ២០១៤ ប៉ុន្តែត្រូវបានយោធាកោះហៅមុនពេលគាត់រត់ភៀសខ្លួន។

រូបតំណាង

នៅទីក្រុងបាងកកថ្ងៃនេះអ្នកគាំទ្រលោក Wanchalerm បានបើកយុទ្ធនាការ hashtag ​នៅលើបណ្តាញសង្គមហ្វេសប៊ុកថា Save Wanchalerm ​។ លោក ​ Krisana Pattanacharoen អ្នកនាំពាក្យ​នៃកងរាជអាវុធហត្ថថៃបានប្រាប់ប្រព័ន្ធផ្សព្វផ្សាយនៅថ្ងៃនេះថា ប៉ូលិសមិនមានព័ត៌មានលំអិតអំពីការបាត់ខ្លួនរបស់លោក Wanchalerm នៅក្នុងប្រទេសកម្ពុជាទេ។ ជាមួយគ្នានេះលោកបានបដិសេធថាប៉ូលិសថៃមិនមានអ្វីពាក់ព័ន្ធនឹង​សំណុំរឿងនេះទេ។

សកម្មជននយោបាយនិងជាអតីតមេដឹកនាំសហភាពនិស្សិតថៃលោក​ Prit  (​Penguin) ​Chivarak បាននិយាយថាក្រុមរបស់លោកនឹងធ្វើបាតុកម្មនៅល្ងាចនេះនៅលើវិថី ​Pathumwan ​ខាងមុខសាលវិចិត្រ​សិល្បៈបាងកកដើម្បីទាមទារយុត្តិធម៌សម្រាប់សកម្មជនដែលត្រូវបានចាប់ខ្លួន។

កែសម្រួលដោយ៖ ភារ៉ា

ប្រភព៖ Thai PBS WORLD

from： https://tnaot.com/km/m/detail/article/9332945