Sign In 
បុរសម្នាក់ ដែលសមត្ថកិច្ចធ្វើការឃាត់ខ្លួន ពាក់ព័ន្ធនឹងសំណុំរឿង ដើរអំពាវនាវស្វែងរកអ្នកទិញកាំភ្លើងខ្លីខុសច្បាប់ ត្រូវបានសមត្ថកិច្ចធ្វើការចាប់បញ្ជូនខ្លួន ទៅកាន់តុលាការនៅព្រឹកថ្ងៃទី១២ សីហា ឆ្នាំ២០២០នេះ ដើម្បីចាត់ការតាមនីតិវិធីច្បាប់ ។
ជុំវិញរឿងនេះ តំណាងអយ្យការអមសាលាដំបូងខេត្ត នៅរសៀលថ្ងៃទី១២ សីហា នេះ បានធ្វើការចោទប្រកាន់លើបុរសជាជនសង្ស័យពីបទ”កាន់កាប់អាវុធដោយខុសច្បាប់” ព្រមទាំងធ្វើការឃាត់ខ្លួនតែម្តង។
ជនសង្ស័យឈ្មោះ សែមសុគន្ធា ហៅម៉ាប់ អាយុ៣២ឆ្នាំ រស់នៅភូមិកម្មករ សង្កាត់ស្វាយប៉ោ ក្រុង-ខេត្តបាត់ដំបង។
ជននេះ ត្រូវបានកម្លាំងជំនាញនៃការិយាល័យព្រហ្មកំរិតធ្ងន់តាមឃាត់ខ្លួនបាន កាលពីរសៀលថ្ងៃទី១១ សីហា នៅម្ដុំវត្តបច្ឆា ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ពេលដែលជននេះកំពុងដើរអំពាវនាវស្វែងរកអតិថិជនទិញកាំភ្លើងខ្លីរបស់ខ្លួន។
បើតាមប្រភពពីមន្ត្រីសមត្ថកិច្ចបានឱ្យដឹងថា ក្រោយពីឃាត់ខ្លួនសមត្ថកិច្ច ក៏បាននាំជននេះ ទៅកាន់លំនៅឋាន ដើម្បីយកកាំភ្លើងដែលជននេះបានលាក់ទុកនៅឯផ្ទះ។
សមត្ថកិច្ចបានដកហូតនោះប្រភេទ«K.59» មានគ្រាប់ចំនួន០៦គ្រាប់។ ជុំវិញការលាក់ទុកនូវអាវុធខ្លីដោយខុសច្បាប់នេះ បើមន្ត្រីជំនាញ ដែលបានស្រង់ចម្លើយបឋមរបស់ជនសង្ស័យឈ្មោះ សែម សុគន្ធា ហៅ ម៉ាប់ នេះបាននិយាយថា កាំភ្លើងខ្លីធុន K.59 នេះ ខ្លួនបានលួចពីមន្ត្រីយោធាម្នាក់ នៅឯស្រុកសំឡូត កាលពីជិត៣ឆ្នាំមុន៕ ដោយ៖ត្នោត
