Sign In 
រាជធានីភ្នំពេញ ៖ អតីតពិធីការិនីធ្លាប់ល្បីឈ្មោះ អេន ជី បានបាត់មុខមួយរយៈ ដោយបានចាកចេញទៅរស់នៅអាមេរិកតាំងពីឆ្នាំ២០១៦កន្លងមក។ ការឈានដល់ទឹកដីដ៏ជឿនលឿននោះ មិនបានធ្វើឱ្យ អេនជី មានការដក់ចិត្ត ពេញដោយសេចក្តីសុខឡើយ។ នៅទីបំផុត អេន ជី បានវិចបង្វិចមករកមុខរបរនៅទឹកដីកំណើតខ្លួនឡើងវិញ ក្រោយពេលពិភាក្សាជាមួយប្តីរួចរាល់ និងហេតុផលមួយចំនួន។
អ្នកនាង អេនជី បានបង្ហាញវត្តមានជាមួយសម្រស់ដ៏គួរឱ្យទាក់ទាញជាមួយឈុតសម្លៀកបំពាក់មួយឈុតដែលរំលឹកដល់សម័យបារាំង។ នៅក្នុងឱកាសដែលអ្នកនាងប្រកាសបើកមុខរបរថ្មី កាលពីព្រឹកថ្ងៃទី១០ សីហា ឆ្នាំ២០២០ កន្លងទៅ។
អ្នកនាង អេន ជី រំភើបរហូតអួលដើម.កស្រក់ទឹកភ្នែក នឹងបានឱ្យដឹងថា នៅអាមេរិកទទួលស្គាល់ថា ជឿនលឿនស៊ីវិល័យ។ ប៉ុន្តែជាកន្លែងដែលត្រូវប្រឹងប្រែងតស៊ូ។ រយៈពេលប៉ុន្មានឆ្នាំនេះមានពេលខ្លះដេកយំនឹកស្រុក នឹកការងារ យំហើយជូតទឹកភ្នែកញញឹម Live លក់របស់របរតាមអនឡាញ នាងមិនចេះនៅស្ងៀមឡើយ។ ម្យ៉ាងទៀត នឹកដល់ម្តាយដែលសួរនាំយើងរហូត ជាហេតុផលកាន់តែខ្លាំង ដោយគិតធ្វើអ្វីម្យ៉ាងពេលមកវិញ។ អេន ជី ដែលប្រកាសមិនចោលសិល្បៈលើកឡើងថា កណ្តោចកណ្តែងនៅស្រុកគេ ពិបាកណាស់ ហើយរឿងកាន់តែធ្ងន់ អំឡុងកូវីដ១៩ ផ្ទុះនៅអាមេរិក រឹតតែជម្រុញ ហើយនាងចង់មកខ្មែរហើយរកវិធីសាស្ត្រមកទាល់តែបាន ទោះត្រូវចំណាយប្រាក់ច្រើនបែបណាក៏ដោយ៕ ដោយ៖ ត្នោត
