Sign In 
អេស្ប៉ាញ ៖ វាត្រូវបានប្រកាសកាលពីថ្ងៃអាទិត្យថា សមាជិកពីរនាក់របស់ក្លិប Atletico Madrid ធ្វើតេស្តមានសញ្ញាវិជ្ជមានកូវីដ១៩ ហើយកាលពីថ្ងៃច័ន្ទក្លិបមួយនេះ ក៏បានបញ្ជាក់ថាសមាជិកទាំងពីររូបនោះគឺជាខ្សែបម្រើ Angel Correa និងខ្សែការពារ Sime Vrsaljko។
កីឡាករទាំង២ នឹងមិនអាចរួមដំណើរជាមួយក្រុមទៅកាន់ទីក្រុងលីសបោន ប្រទេសព័រទុយហ្គាល់ សម្រាប់ការប្រកួតវគ្គ ៨ក្រុមចុងក្រោយនៃក្របខ័ណ្ឌ Champions League ទល់នឹងក្រុម RB Leipzig បានទេ។
ទោះបីជាយ៉ាងណាដំណឹងល្អសម្រាប់ក្រុម Atletico Madrid គឺថា គ្មានកីឡាករ ឬគ្រូបង្វឹកណាម្នាក់បានទទួលលទ្ធផលវិជ្ជមាននោះទេ បន្ទាប់ពីពួកគេបានទៅធ្វើតេស្តជាថ្មីកាលពីថ្ងៃអាទិត្យ។ ខណៈក្រុមគ្រួសាររបស់ Correa និង Vrsaljko ក៏ត្រូវបានឆ្លងកាត់ការធ្វើតេស្តផងដែរ ហើយជាលទ្ធផល គឺអវិជ្ជមានដូចគ្នា។
នៅក្នុងសេចក្តីថ្លែងការណ៍មួយ ដែលចេញផ្សាយនៅរសៀលថ្ងៃច័ន្ទក្លិប Atletico Madrid បានបង្ហាញពីអត្តសញ្ញាណនៃករណីទាំងពីរនេះ។ មុនពេលថ្លែងអំណរគុណដល់ប្រព័ន្ធផ្សព្វផ្សាយ ដែលមិនបានបង្ហាញពីអត្តសញ្ញាណ មុនពេលសេវាកម្មសុខាភិបាលរបស់ក្លិប ទទួលបានការអនុញ្ញាតបង្ហាញពីអត្តសញ្ញាណលើករណីនេះ៕ ផ្តល់សិទ្ធិដោយ៖ កោះសន្តិភាព
