Sign In 
ព្រឹត្តិការណ៍ថ្មីមួយមិនធ្លាប់មាននៅកម្ពុជា ត្រូវបានក្រុមយុវជនស៊ីក្លូ រៀបចំឡើងដើម្បីបង្កើតឱ្យមានព្រឹត្តការណ៍ជិះស៊ីក្លូជាលើកដំបូងពីភ្នំពេញ ទៅខេត្តសៀមរាប ជាមួយប្រធានបទ “ជិះស៊ីក្លូពីភ្នំពេញទៅសៀមរាប” ដើម្បីរួមគ្នាថែរក្សាបរិស្ថាន និងអភិរក្សយន្តជំនិះគ្មានផ្សែង។
ព្រឹត្តការណ៍នេះ ធ្វើឡើងក្នុងចេតនាអភិរក្សធាក់ស៊ីក្លូ ដែលមានអាយុកាលប្រមាណមួយសវត្ស៍មកហើយនោះ កំពុងតែជិតបាត់បង់រូបរាងទាំងស្រុងនាពេលអនាគតដ៏ខ្លីខាងមុខ ខណៈព្រឹត្តិការណ៍គ្រោងនឹងរៀបចំធ្វើនៅវេលាម៉ោង ៣ រសៀល ថ្ងៃទី១៤ ខែសីហា ឆ្នាំ២០២០ ដោយធ្វើការជួបជុំគ្នានៅចំណុចរង្វង់មូលមច្ឆាស្ពានដែកបាឡេ។
លោក អ៊ីវ សំណាង ប្រធានក្រុមយុវជនស៊ីក្លូ បានប្រាប់ TNAOT APP ឱ្យដឹងថា គោលបំណងនៃ យុទ្ធនាការនេះ រៀបចំឡើងដើម្បីផ្សព្វផ្សាយបំផុសឱ្យប្រជាពលរដ្ឋខ្មែរចូលរួមគាំទ្រនូវការប្រើប្រាស់មធ្យោបាយដឹកជញ្ជូនដោយស៊ីក្លូឡើងវិញ ព្រមទាំងធ្វើការអភិរក្សស៊ីក្លូ ខណៈកំពុងឈានទៅរកការបាត់បង់។ “ស៊ីក្លូ គឺជាយានជំនិះមួយប្រភេទ ដែលអាចរំកិលទៅមុខបាន តាមរយៈការប្រើកម្លាំងមនុស្ស គ្មានការប្រើប្រាស់គ្រឿងម៉ាស៊ីន មិននាំឱ្យមានផ្សែងបំពុលដល់បរិដ្ឋានឡើយ”។
ការស្រឡាញ់បរិស្ថាន និងស៊ីក្លូ គឺជាការចាប់ផ្តើម ដែលនាំឱ្យកើតមាននូវព្រឹត្តិការណ៍នេះ ប៉ុន្តែអ្វីសំខាន់ជាងនេះទៀត គឺការស្វែងរកមូលនិធិ ដើម្បីជួយទ្រទ្រង់ដល់អ្នកកំពុងប្រកបមុខរបរធាក់ស៊ីក្លូ ពិសេសក្រុមមនុស្សវ័យចំណាស់ ដែលនៅស្ម័គ្រចិត្តប្រកបមុខរបរធាក់ស៊ីក្លូ។
ចំពោះយុទ្ធនាការនៅតាមផ្លូវ ក្រុមយុវជនស៊ីក្លូគ្រោងធ្វើការផ្សព្វផ្សាយ តាមរយៈការដាក់តាំងស៊ីក្លូនៅហ្នឹងកន្លែង មានន័យថា នៅពេលទៅដល់គោលដៅឈប់កន្លែងណា ដាក់តាំងបង្ហាញស៊ីក្លូនៅកន្លែងនោះ ដើម្បីឱ្យប្រជាពលរដ្ឋ បានចូលរួមថតរូប ឬជិះលេងនៅហ្នឹងកន្លែងតែម្តង។ “ក្រុមយុវជនស៊ីក្លូក៏បានត្រៀមរៀបចំបោះតង់ ដុតភ្លើង កម្សាន្តនាពេលរាត្រី ជាមួយក្រុមការងារ និងលោកតាស៊ីក្លូចាស់ៗដែលបានចូលរួមនៅក្នុងយុទ្ធនាការនេះផងដែរ”។ នេះបើតាមការបញ្ជាក់បន្ថែមពីយុវជន អ៊ីវ សំណាង ដោយលោកបន្ថែមថា នៅតាមផ្លូវ ប្រសិនបើមានអ្នកចង់ចូលរួមធ្វើដំណើរទៅសៀមរាប គឺយើងនឹងឱ្យពួកគាត់ចូលរួមធាក់ស៊ីក្លូ ដើម្បីផ្លាស់ប្តូរកម្លាំងគ្នាជាមួយនឹងក្រុមយុវជន។
បើតាមការគ្រោងទុក ព្រឹត្តិការណ៍នេះ នឹងធ្វើក្នុងរយៈពេល៣ថ្ងៃ ដោយ ១ថ្ងៃ ត្រូវធាក់ស៊ីក្លូ ១០០ គីឡូម៉ែត្រ ដោយចំណាយពេលប្រហែលជាបីថ្ងៃ ពោលអាចនឹងទៅដល់សៀមរាប នៅថ្ងៃទី១៧ ឬ ១៨ ខែសីហា។
ពេលទៅដល់សៀមរាប ក៏នឹងមានការជិះដង្ហែ នៅក្នុងក្រុងសៀមរាប ដើម្បីបង្ហាញដល់ប្រជាពលរដ្ឋ ដែលរស់នៅខេត្តសៀមរាប ឱ្យបានដឹង ឬទទួលព័ត៌មានអំពីការមកដល់ទឹកដីខេត្តសៀមរាបជាលើកដំបូងនៃស៊ីក្លូ ។ មិនត្រឹមតែប៉ុណ្ណោះ ក្រុមយុវជនស៊ីក្លូ បានបញ្ជាក់បន្ថែមថា កាហ្វេវប្បធម៌មាត់ស្ទឹង ដែលជាហាងកាហ្វេមានការរចនាបែបបុរាណរបស់លោកអាចា្យធំ គឺជាទីតាំងជួបជុំនៅខេត្តសៀមរាប នៅពេលក្រុមយុវជនស៊ីក្លូបានទៅដល់ខេត្តសៀមរាប ដូចនេះ បងប្អូនអាចចូលរួមជិះស៊ីក្លូ និងរូបថតទុកជាអនុស្សាវរីយ៍ ដោយមានការស្លៀកពាក់បុរាណផងដែរ។
ជាមួយគ្នាផងដែរ ប្រធានក្រុមយុវជនស៊ីក្លូ កំពុងព្យាយាមសុំការអនុញ្ញាត ឱ្យមានការដាក់តាំងបង្ហាញនៅមុខ ឬចំហៀងប្រាសទអង្គរតូចបន្ថែមទៀត ខណៈអាជ្ញាធរអប្សរា លោកបានអនុញ្ញាតឱ្យមានការដាក់តាំងស៊ីក្លូនៅប្រាសាទបាយ័ន (អង្គរធំ) ។
តាមរយៈព្រឹត្តការណ៍ដ៏អស្ចារ្យនេះ ក្រុមយុវជនស៊ីក្លូ បានអំពាវនាវឱ្យស្ថាប័នពាក់ព័ន្ធ និងប្រជាពលរដ្ឋមានការចូលរួមឱ្យបានច្រើនកុះករ ដើម្បីអភិរក្សស៊ីក្លូ និងទទួលបានមូលនិធិមួយផ្នែក សម្រាប់ជួយទ្រទ្រង់ដល់ជីវភាព មនុស្សវ័យចំណាស់ជាច្រើន ដែលកំពុងប្រកបមុខរបរធាក់ស៊ីក្លូនេ។ ចំពោះការចូលរួមបរិច្ចាគ ប្រជាពលរដ្ឋអាចចូលរួមបានតាមរយៈលេខទូរសព្ទ ០៩៣ ៨៧ ៩៧ ០៣ ឬទំព័រហេ្វសបុកក្រុមយុវជនស៊ីក្លូកម្ពុជា ដោយ៖ ឃួន លក្ខិណា
