Sign In 
អង់គ្លេស ៖ វ៉ែនតាដែលគេគិតថា ជាកម្មសិទ្ធិរបស់មេដឹកនាំឯករាជ្យឥណ្ឌា លោកមហាត្មៈគន្ធី ត្រូវបានគេដាក់ដេញថ្លៃក្នុងតម្លៃជាង១៩,០០០ដុល្លារ បន្ទាប់ពីត្រូវបានទុកចោលនៅលើប្រអប់សំបុត្រ។
ប្រហែលជា ៤សប្តាហ៍មុន នៅព្រឹកថ្ងៃច័ន្ទ អ្នកដេញថ្លៃ Andy Stowe បានចូលធ្វើការ ហើយកំពុងពិនិត្យមើលប្រអប់សំបុត្រនៅឯការិយាល័យរបស់គាត់ នៅក្នុងសួនឧស្សាហកម្មមួយក្នុងទីក្រុង Bristol ភាគនិរតីនៃប្រទេសអង់គ្លេស។
លោកបានប្រាប់ CNN ថា៖ «ខ្ញុំបានឃើញស្រោមសំបុត្រមួយព្យួរចេញពីប្រអប់សំបុត្ររបស់យើង។ នៅពេលដែលមិត្តរួមការងារម្នាក់បានបើកស្រោមសំបុត្រ ពួកគេបានរកឃើញអ្វីដែលមិនធម្មតា ដែលវាជាវ៉ែនតាមាសមូលៗ»។
លោកបាននិយាយបន្តថា៖ «ជាមួយនឹងវ៉ែនតានោះ មានសារមួយសរសេរថា វាគឺជារបស់លោកមហាត្មៈគន្ធី ហើយពូរបស់ខ្ញុំបានទទួលយកវាទុក»។
លោក Stowe បានប្រាប់ CNN ថាគាត់បានហៅលេខទូរស័ព្ទនៅលើនោះហើយបានតាមរកអ្នកលក់របស់របរនោះ ដែលជាបុរសចំណាស់ម្នាករស់នៅក្នុងស្រុក។ បុរសនោះបានប្រាប់ លោក Stowe ថាវ៉ែនតាត្រូវបានប្រគល់ឱ្យគាត់ពីពូរបស់គាត់ ដែលបានប្រាប់គាត់ថា លោកគន្ធីបានឱ្យគាត់ពេលគាត់កំពុងធ្វើការនៅអាហ្វ្រិកខាងត្បូង។
លោក Stowe បានប្រាប់ CNN ថា៖ «យើងបានចាប់ផ្តើមធ្វើការស្រាវជ្រាវខ្លះ ហើយបានដឹងថាវ៉ែនតាទាំងនោះមានតម្លៃរាប់ពាន់ផោន។ វាត្រូវបានគេរំពឹងថានឹងលក់បានតម្លៃច្រើនគួរសម»។ វ៉ែនតានោះ នឹងត្រូវដាក់លក់ដេញថ្លៃនៅថ្ងៃទី២១ សីហា៕ ផ្តល់សិទ្ធិដោយ៖ កោះសន្តិភាព
