ភ្នំពេញ៖ ប្រភេទសត្វកម្រនៅកម្ពុជា បានងាប់ជាបន្តបន្ទាប់ដោយសារជាប់អន្ទាក់ និងថ្នាំបំពុល។ ក្នុងចំណោមសត្វកម្រទាំងនោះ គេសង្កេតឃើញថា មានសត្វទន្សោង៥ក្បាល​ ខ្ទីង១ក្បាល និង ត្រយ៉ងយក្ស៣ក្បាល បានងាប់នៅទីតាំងផ្សេងៗពីគ្នា។

​ព័ត៌មានក្នុងស្រុកបានផ្សាយថា សត្វ​ទន្សោង​ឈ្មោល​ ១ ​ក្បាល​​បាន​ងាប់ ដោយសារ​របួសធ្ងន់​ពី​ការជាប់​អន្ទាក់​ព្រានព្រៃ​នៅក្នុង​ដែនជម្រក​សត្វព្រៃ​សង្ឃរុក្ខវ័ន ខេត្ត​ឧត្តរមានជ័យ​កាលថ្ងៃ​ទី​ ២៤ ឧសភា ខណៈ​សត្វ​ខ្ទីង​ ១ ​ក្បាល​ត្រូវ​បាន​គេ​ប្រទះឃើញ​ងាប់​ក្នុង​ដែនជម្រក​សត្វព្រៃ​ព្រះរកា​ស្រុក​ជាំក្សាន្ត ខេត្តព្រះវិហារ​។ ​

អ្នកនាំពាក្យ​ក្រសួង​បរិស្ថាន លោក នេត្រ ភក្ត្រា ​បានឲ្យដឹងក្នុងពេលថ្មីៗនេះថា គិតពីដើមឆ្នាំ ២០២០ មកទល់នឹងថ្ងៃទី២៤ ខែឧសភា ឆ្នាំ ២០២០ នេះ សត្វទន្សោង ៤ ក្បាលត្រូវបានរកឃើញងាប់ ១ក្បាលនៅក្នុងខេត្តកំពង់ស្ពឺងាប់ ដោយសារជាប់អន្ទាក់ និង២ ក្បាលទៀតត្រូវបានរកឃើញថាបាញ់ងាប់ នៅក្នុងខេត្តមណ្ឌលគិរី និង សត្វទន្សោងមួយក្បាលផ្សេងទៀតបានងាប់ ដោយសារតែជាប់អន្ទាក់របស់ព្រាន ព្រៃ ក្នុងដែនជម្រកសត្វព្រៃសង្ឃរុក្ខវ័ន។មួយករណីទៀត ដែលទើបបានរកឃើញ គឺកូនសត្វទន្សោងញីមួយក្បាលដែលមានអាយុប្រមាណទើប ៣ ខែទៅ ៤ ខែត្រូវបាន មន្ត្រី​ឧទ្យានុរក្សរកឃើញថា ស្លាប់កាលពីថ្ងៃទី២ ខែមិថុនា ឆ្នាំ ២០២០ នៅក្នុងតំបន់ស្នូល នៃ​ដែនជម្រកសត្វព្រៃលំផាត់ក្នុងស្ថិតក្នុង ភូមិរវាក់ ឃុំរយ៉ ស្រុកកោះញែក ខេត្តមណ្ឌលគិរី។

ក្រៅពីទន្សោង សត្វត្រយ៉ង​យក្ស​ចំនួន ៣ក្បាល ត្រូវ​បាន​បំពុលងាប់​ ក្នុង​ដែន​ជម្រក​សត្វព្រៃឆែប ខេត្តព្រះវិហារ ត្រូវបានប្រទះឃើញ​កាលពីថ្ងៃទី៩ ខែមេសា ឆ្នាំ​២០២០។ នេះបើតាមសេចក្តី​ប្រកាស​ព័ត៌មាន​របស់​អង្គការ WCS កាលពីថ្ងៃទី១៦ ខែមេសា ឆ្នាំ​២០២០។ ដោយ៖ ប៊ុនធឿន 

from： https://tnaot.com/km/m/detail/article/9327678