Sign In 
រដ្ឋមន្រ្តីក្រសួងពាណិជ្ជកម្មតួកគី បានថ្លែង កាលពីថ្ងៃទី៤ ខែមិថុនា ឆ្នាំ២០២០ថា តួកគីបានបើកច្រកទ្វារព្រំដែនរបស់ខ្លួនឡើងវិញជាមួយអ៊ីរ៉ង់ និងអ៊ីរ៉ាក់ បន្ទាប់ពីបិទទ្វារ អស់រយៈពេលជាច្រើនខែ ដើម្បីទប់ស្កាត់ជំងឺកូវីដ១៩ ឆ្លងរាតត្បាត ។
លោកស្រី Ruhsar Pekcan រដ្ឋមន្ត្រីក្រសួងពាណិជ្ជកម្មតួកគី បានថ្លែងថា ច្រកទ្វារព្រំដែន Habur និង Gurbulak ត្រូវបើកឲ្យដំណើរការជាថ្មី សម្រាប់ដឹកជញ្ជូនទំនិញជាលក្ខណៈអន្តរជាតិ។
លោកស្រីបានថ្លែងថា ការរឹតត្បិត នាពេលកន្លងមកនោះ ត្រូវបានបន្ធូរបន្ថយវិញ ពីព្រោះការឆ្លងរាលដាលពីវីរុសកូវីដ១៩ នៅទូទាំងពិភពលោក មានការធ្លាក់ចុះ ក៏ដូចជា ការថយចុះករណីកូវីដ១៩ នៅក្នុងប្រទេសអ៊ីរ៉ាក់ និងអ៊ីរ៉ង់ ផងដែរ ។ 
លោកស្រីបានបន្ថែមថា ការបើកទ្វារគយឡើងវិញនេះ ក៏ជាការបញ្ចប់កិច្ចព្រមព្រៀងពាណិជ្ជកម្មសេរី ដែលបានអនុវត្ត នៅអំឡុងពេលបិទទ្វារ ដើម្បីទប់ស្កាត់ការរាតត្បាតពីវីរុសនោះ។
កាលពីដើមខែមីនា ឆ្នាំ២០២០ តួកគីបានបិទទ្វារព្រំដែនរបស់ខ្លួនជាមួយប្រទេសជិតខាង ក្នុងនោះ រួមមាន អ៊ីរ៉ង់ និងអ៊ីរ៉ាក់ ផងដែរ ដើម្បីទប់ស្កាត់ការឆ្លងរាតត្បាតវីរុសកូវីដ១៩ ។ 
ក្រោយការប្រកាសបិទទ្វារព្រំដែននោះ ក្រសួងពាណិជ្ជកម្មតួកគី បានផ្តោតទៅលើកិច្ចព្រមព្រៀងពាណិជ្ជកម្មបរទេសសេរី ដើម្បីបន្តការនាំចេញ និងនាំចូលរបស់តួកគី ៕ ប្រែសម្រួលដោយ៖ thach yat
