Sign In 
ប៉ុន្មានឆ្នាំចុងក្រោយនេះជម្រើសជាតិកម្ពុជា ទទួលបានការគាំទ្រច្រើនពីទស្សនិកជន ដោយមានអ្នកទិញសំបុត្រចូលទស្សនារាប់ម៉ឺននាក់ ពេលប្រកួតអន្តរជាតិម្ដងៗ ហើយក្នុងនោះក៏មានកញ្ញា ហួត ធឿងលីដា អង្គុយលើរទេះរុញម្នាក់ដែរ។ ប្រាប់មកកាន់ Sabay កញ្ញា លីដា ចាប់ផ្ដើមស្រលាញ់ និងគាំទ្រជម្រើសជាតិកម្ពុជា តាំងពីឆ្នាំ ២០១៦។ ក្នុងនាមជាអ្នកគាំទ្រមួយរូប លីដា ចង់ឱ្យកីឡាករជម្រើសជាតិម្នាក់ៗ មានឆន្ទៈនិងលេងឱ្យអស់ពីសមត្ថភាព ដើម្បីឱ្យពិភពលោកស្គាល់ប្រទេសកម្ពុជាកាន់តែច្រើន។
កញ្ញា លីដា បញ្ជាក់ថា ៖«…ខ្ញុំគ្រាន់តែចង់ឱ្យកីឡាករទាំងអស់ គាត់យកបេះដូងទៅលេង លេងដោយឆន្ទៈ មិនមែនលេងលក្ខណៈជា Star (តួឯក) ព្រោះបាល់ទាត់បង្ហាញឱ្យពិភពលោកស្គាល់ច្រើន។ ព្រោះថាបាល់ទាត់ចេញទៅក្រៅច្រើន…និយាយទៅបានបង្ហាញពីប្រទេសរបស់យើង ហើយបើពួកគាត់ លេងដោយយកបេះដូងទៅលេង លេងដោយឆន្ទៈ លេងដោយមនសិការ ពួកគាត់ចង់ឈ្នះដើម្បីប្រទេស គឺខ្ញុំសប្បាយចិត្ត ការចំណាយរបស់ខ្ញុំគ្មានបានអីមកវិញទេ ចង់បានតែប៉ុណ្ណឹង អ្នកគាំទ្រអ្នកណាក៏ដូចអ្នកណាដែរ…»។
ក្រៅជាអ្នកគាំទ្រក្រុមជម្រើសជាតិ លីដា ក៏ជាស្ត្រីខ្មែរសកម្មមួយរូប ដែលគាំទ្រក្លឹបបាល់ទាត់វិសាខា ចាប់ផ្ដើមតាំងពីឆ្នាំ២០១៧មក។ ក្នុងរដូវកាលឆ្នាំ២០១៨-២០១៩ កញ្ញាបានទៅទស្សនា ស្ទើរគ្រប់ការប្រកួតរបស់វិសាខាទូទាំងរាជធានីខេត្តក្រុង ខណៈឆ្នាំនេះកញ្ញាក៏បានរៀបគម្រោងរួចរាល់ ដើម្បីទៅទស្សនាការប្រកួត។ ហួត ធឿងលីដា ប្រាប់ថា ៖«ខ្ញុំចូលចិត្តមើលបាល់ ពេលខ្ញុំអត់បានមើលផ្ទាល់ ខ្ញុំមើលតាម Live ហើយឆ្នាំទៅខ្ញុំមើលសឹងគ្រប់ការប្រកួត។ 
អំឡុងពេលកូវីដលុកលុយ មានផេកខ្លះគាត់ Live ការប្រកួតចាស់ៗ ខ្ញុំមើលតាម Live ទៅ ជួនកាលចូលទៅមើលក្នុង YouTube អ៊ីចឹងទៅ»។ ចំពោះផលពិបាក អ្នកគាំទ្របាល់ទាត់រូបនេះថា ពុំសូវមានជាបញ្ហាចោទច្រើនឡើយ ព្រោះខាងក្លឹបវិសាខាដែលបច្ចុប្បន្នកំពុងឈរលេខរៀងទី៣នៃលីគកំពូលកម្ពុជា បានជួយសម្រួលដល់ខ្លួនច្រើន៕
