អតីតរដ្ឋមន្រ្តីក្រសួងការពារជាតិអាមេរិក លោក Jim Mattis កាលពីថ្ងៃទី​៣ ខែមិថុនា ឆ្នាំ២០២០ បានថ្លែង​ចោទប្រកាន់​ប្រធានាធិបតី ដូណាល់ ត្រាំ ថា ​កំពុងព្យាយាម​បែងចែក​​បំបែក​បំបាក់​ប្រជាជន​អាមេរិក។ លោក Mattis ក៏បានរិះគន់​លោក ដូណាល់ ត្រាំ ​ប្រើប្រាស់​កម្លាំង​ទាហាន​​​បង្ក្រាប​​បាតុករ ​បង្កភាពវឹកវរ។ 

បាតុកម្ម​បានផ្ទុះឡើងនៅ​សហរដ្ឋអាមេរិក​ ​ចាប់តាំងពីថ្ងៃទី​២៥ ខែឧសភា ឆ្នាំ២០២០ គឺក្រោយពេលបុរសស្បែកខ្មៅ​ម្នាក់ឈ្មោះ George Floyd បានស្លាប់ ​​ខណៈស្ថិតនៅក្រោមការឃុំឃាំង​របស់ប៉ូលិស​ ស្ថិតក្នុងទីក្រុង Minneapolis រដ្ឋ Minnesota សហរដ្ឋអាមេរិក ។ 

លោក Jim Mattis អតីត​រដ្ឋមន្ត្រី​ក្រសួងការពារជាតិអាមេរិក ដែលបានលាលែង​ពីតំណែង​ កាលពីអំឡុងឆ្នាំ​ ២០១៨ ក្រោម​រដ្ឋបាលលោក ដូណាល់ ត្រាំ នោះ បានចេញសេចក្ដីថ្លែងការណ៍​មួយ ​ផ្សព្វផ្សាយ​ នៅលើ​សារព័ត៌មាន Atlanticថា «លោក ដូណាល់ ត្រាំ គឺជាប្រធានាធិបតី​លើកដំបូង​គេបំផុត ​នៅក្នុង​ជីវិត​របស់ខ្ញុំ​​ ដែលមិនបាន​ព្យាយាមបង្រួបបង្រួម​ពលរដ្ឋអាមេរិក សូម្បីតែ​ការព្យាយាម​រួបរួម​ក៏គ្មាន» ផងដែរ។ លោក Mattis បន្តថា «ផ្ទុយទៅវិញ គាត់ (ដូណាល់ ត្រាំ)​ ព្យាយាមបំបែកបំបាក់យើង ។ យើង​កំពុង​តែ​មើលឃើញ​អំពីផលវិបាក ​ក្នុងរយៈពេល​៣ឆ្នាំមកនេះ ទៅលើការខំប្រឹងប្រែង ​ដោយចេតនា​នោះ» ។

លោក Jim Mattis ក៏បានប្រៀបធៀប​​ស្ថានការណ៍នេះ​ទៅនឹង​សង្គ្រាម​អាមេរិក ​ប្រឆាំង​ជាមួយ​ពួក​ណាស៊ីអាល្លឺម៉ង់ ដោយ​កងទ័ពអាមេរិក ​ត្រូវបាន​ក្រើន​រំឭកឲ្យដឹងជាមុន ដែលថា «ពាក្យស្លោក​របស់ពួកណាស៊ី​ដើម្បីកម្ទេចយើង​នោះ…គឺថា «បំបែកបំបាក់ គឺជាជ័យជម្នះ»។ 

ជាមួយគ្នានេះដែរ លោក Mattis ក៏បានរិះគន់​ចំដល់កងកម្លាំងអនុវត្តច្បាប់ ​ក្រោមការដឹកនាំរបស់លោក ដូណាល់ ត្រាំ ដែលថ្មីៗនេះ​​បានបោសសម្អាត​ទៅលើ​ក្រុមបាតុករ​ធ្វើបាតុកម្ម​ ដោយសន្តិវិធី។ លោកបានរិះគន់​ទៅនឹងការប្រើពាក្យថា «សមរភូមិ» របស់​រដ្ឋមន្ត្រីក្រសួងការពារជាតិ Mark Esper និងឧត្តមសេនីយ៍ទោ Mark Milley នាយអគ្គសេនាធិការកងទ័ពចម្រុះ ដែលសម្តៅទៅលើ​ទីកន្លែងធ្វើបាតុកម្ម​របស់ក្រុមបាតុករ​នៅក្នុងទឹកដីអាមេរិក ។ 

លោក Mattis បានសរសេរថា «យើងត្រូវតែបដិសេធ​រាល់ការគិត​ណាមួយ ដែលចាត់ទុក​រដ្ឋធានីទាំងឡាយ​របស់យើងជាទីកន្លែង​ «សមរភូមិ»​នោះ» ។

លោក ដូណាល់ ត្រាំ គំរាម​ដាក់ពង្រាយ​ទាហានសកម្ម​ បើទោះជា​​នៅក្នុងរដ្ឋ​នានា​ ប្រឆាំង​ចំពោះ​ការប្រើប្រាស់​ទាហាន​ទាំងនោះ​យ៉ាងណាក៏ដោយ។ វាបានបង្កើត​ឲ្យមាន​ភាពចលាចល​ នៅក្នុងជួរកងកម្លាំងយោធា ក៏ដូច​នៅក្នុងសភា​ផងដែរ ខណៈសមាជិកសភាជាន់ខ្ពស់​ នៃ​គណបក្សសាធារណរដ្ឋ បាន​ព្រមានថា កម្លាំងកងទ័ព​អាមេរិក អាចក្លាយទៅជា​«ខ្ទមនយោបាយ»​​នោះយ៉ាងណាក៏ដោយ ។  

លោក Mattis បានសរសេរថា​ «ការឆ្លើយតប​ដោយកងកម្លាំងយោធា​របស់យើង ដូចដែលបានឃើញ​ នៅ​រដ្ឋធានី​វ៉ាស៊ីនតោន ឌីស៊ី បង្កើតឲ្យមានជម្លោះ ហើយក្លាយជាជម្លោះដ៏បរាជ័យមួយ រវាងសង្គមយោធា និងសង្គមស៊ីវិល» ៕ ប្រែសម្រួលដោយ៖ thach yat 

from： https://tnaot.com/km/m/detail/article/9319626