កិច្ចប្រជុំកំពូល G7 នឹងត្រូវធ្វើឡើង នៅចុងខែមិថុនា តែត្រូវលើកពេលទៅខែកញ្ញា នៅលើទឹកដីអាមេរិក ហើយប្រធានាធិបតី ដូណាល់ ត្រាំ ចង់ឲ្យមានវត្ដមានរបស់រុស្ស៊ី នៅក្នុងកិច្ចប្រជុំកំពូលនោះ ព្រោះរុស្ស៊ីនឹងអាចជួយដោះស្រាយបញ្ហាជាច្រើនរបស់ពិភពលោកបាន។

ប្រធានាធិបតីអាមេរិក បានផ្ដល់បទសម្ភាសន៍ជាមួយនឹងលោក Brian Kilmeade ហើយផ្សាយតាមទូរទស្សន៍ Fox News ថា លោកនឹងអញ្ជើញ​ប្រធានាធិបតីរុស្ស៊ី លោក វ៉្លាឌីមៀរ ពូទីន មកចូលរួម នៅកិច្ចប្រជុំពូល នៅអាមេរិក នាឆ្នាំ២០២០នេះ។ វត្ដមានរបស់រុស្ស៊ី នឹងជួយដោះស្រាយបញ្ហាជាច្រើនរបស់ពិភពលោកបាន។

លោកប្រធានាធិបតីអាមេរិក បានបញ្ជាក់ថា ការអញ្ជើញប្រធានាធិបតីរុស្ស៊ី លោក ពូទីន មកចូលរួម នៅក្នុងកិច្ចប្រជុំនេះ ព្រោះរុស្ស៊ីអាចនឹងជួយអាមេរិក អំពីបញ្ហាឧស្សាហកម្មប្រេង ដែលជាចំណុចល្អរបស់គាត់។ ក្រៅពីនេះ ក៏មានបញ្ហាជាច្រើនទៀត ហើយវាអាចដោះស្រាយបានយ៉ាងងាយស្រួលបំផុតផងដែរ។

លោក ដូណាល់ ត្រាំ បានបន្ដថា បញ្ហាមានច្រើនណាស់ ដូច្នេះយើងត្រូវតែអង្គុយនិយាយគ្នាជាមួយលោក ពូទីន ។ ក្រោយបញ្ចប់កិច្ចប្រជុំកំពូលនោះ នឹងមានមនុស្សជាច្រើនសួរលោក ពូទីន ហើយទាក់ទង ពូទីន អំពីបញ្ហាផ្សេងៗទៀត។

ប្រធានាធិបតីអាមេរិក បានបន្ថែមថា ក្រៅពីនេះ «លោកក៏ចង់ចុះហត្ថលេខាលើកតិកាសញ្ញានុយក្លេអ៊ែរ ព្រោះបញ្ហាអាវុធនុយក្លេអ៊ែរនេះ គឺជាបញ្ហាចម្បងបំផុតរបស់ពិភពលោក។ លោកមិនចង់ពង្រីកកតិកាសញ្ញានេះទេ ហើយបញ្ហានេះក៏បូករួមជាមួយប្រទេសជាច្រើនទៀតផងដែរ។

​​ប្រធានាធិបតីអាមេរិក កាលពីសប្ដាហ៍មុន បានបញ្ជាក់ថា កិច្ចប្រជុំ G7 នឹងធ្វើនៅសហរដ្ឋអាមេរិក នាចុងខែមិថុនា តែត្រូវលើកពេលទៅខែកញ្ញា វិញ។ នៅក្នុងកិច្ចប្រជុំកំពូលនោះ លោកមានគម្រោងអញ្ជើញរុស្ស៊ី កូរ៉េខាងត្បូង អូស្រ្ដាលី និងឥណ្ឌាផងដែរ។

សូមជម្រាបថា G7 (The Group of Seven) គឺជាអង្គការសេដ្ឋកិច្ចអន្ដររដ្ឋាភិបាលអន្ដរជាតិ មានប្រទេសមហាអំណាចសេដ្ឋកិច្ចចំនួន៧ រួមមាន កាណាដា​ បារាំង អាល្លឺម៉ង់ អ៊ីតាលី ជប៉ុន អង់គ្លេស និងសហរដ្ឋអាមេរិក៕ ប្រែសម្រួល ដោយ Nuon

from： https://tnaot.com/km/m/detail/article/9317679