កងកម្លាំងទាហាន​អាមេរិក​យ៉ាងតិច ​១ ៦០០ នាក់​ត្រូវបានចល័តឲ្យចូល​ទៅកាន់​តំបន់​ វ៉ាស៊ីនតោន​​ឌីស៊ី សហរដ្ឋអាមេរិក បន្ទាប់ពី​ការផ្ទុះឡើងនូវបាតុកម្ម​ហិង្សាទាំងយប់ ទាំងថ្ងៃ​របស់ក្រុមបាតុករ ។ 

សារព័ត៌មានរ៉យទ័រ បានផ្សាយ ​កាលពីថ្ងៃទី២ ខែមិថុនា​ ឆ្នាំ២០២០ថា មន្ទីរបញ្ចកោណ​ បានចល័តកងទ័ពចូលទីក្រុងវ៉ាស៊ីន​តោន​ប្រហែល ១ ៦០០ នាក់ ។ ការចូលមកដល់របស់កម្លាំងទាហានទាំងនោះ​ដើម្បីគ្រប់គ្រងស្ថានការណ៍ហិង្សា ដែល​បង្កឡើងដោយក្រុមបាតុករ ។ 

អ្នកនាំពាក្យមន្ទីរបញ្ចកោណ លោក Jonathan Rath Hoffman បានថ្លែងថា កងទ័ពកំពុងស្ថិតក្នុងស្ថានភាពប្រកាសអាសន្នខ្ពស់ ប៉ុន្តែ «មិនបានចូលរួមគាំទ្រផ្នែកការពារប្រតិបត្តិការរបស់អាជ្ញាធរស៊ីវិលនោះទេ» ។ លោកថា កម្លាំងសកម្ម​ទាំងនេះ​ស្ថិតនៅ​មូលដ្ឋាន National Capital Region ប៉ុន្តែមិនមែននៅទីក្រុងវ៉ាស៊ីនតោនឌីស៊ីនោះទេ ។

គួរបញ្ជាក់ថា កាលពីពេលថ្មីៗនេះ ប្រធានាធិបតីអាមរិក លោក ដូណាល់ ត្រាំ បានស្នើដល់កងកម្លាំងយោធា​​​​ជួយគ្រប់គ្រងស្ថាន​ការណ៍​នៅតាមដងផ្លូវ​ក្នុងរដ្ឋធានានា​ ដែលកំពុងញាំញីដោយក្រុមបាតុកររាប់ពាន់នាក់ ។ ក្រុមបាតុករ​ដង្ហែក្បួន ស្រែកទាមទារយុត្តិធម៌​ជូនបុរសស្បែកខ្មៅ​ម្នាក់​ឈ្មោះ George Floyd ដែលស្លាប់​​ កាលពីថ្ងៃទី២៥ ខែឧសភា ឆ្នាំ២០២០ ដោយសារ​ប៉ូលិស​ម្នាក់យកជង្គង់សង្កត់ក​ ប្រហែលជាង​៨នាទី​​ ថប់ដង្ហើម ស្ថិតនៅទីក្រុង​ Minneapolis រដ្ឋ​ Minnesota ។ 

បាតុកម្ម​រីករាលដាល​ពាសពេញទីក្រុង​សំខាន់ នៅទូទាំងអាមេរិក ក្នុងនោះ​ពេលខ្លះ​ផ្ទុះឡើង​នូវអំពើហិង្សា និងឆក់ប្លន់ទ្រព្យសម្បត្តិសាធារណៈ ដែលជាហេតុ​​នាំឲ្យ​កម្លាំងយោធា​ចេញមុខធ្វើអន្តរាគមន៍ ៕ ប្រែ​សម្រួល​ដោយ៖ thach yat

from： https://tnaot.com/km/m/detail/article/9308896