អតីតអនុប្រធានាធិបតីអាមេរិក និងជាបេក្ខភាពប្រធានាធិបតី សម្រាប់ការបោះឆ្នោត នៅខែវិច្ឆិកា ឆ្នាំ​២០២០ លោក​ Joe Biden ​បានប្រកាសថា ​លោកនឹងដោះស្រាយបញ្ហារើសអើងជាតិសាសន៍​ ដែលបាន​ធ្វើឲ្យប៉ះពាល់យ៉ាងខ្លាំងដល់ផលប្រយោជន៍សហគមន៍ជនជាតិស្បែកខ្មៅ នៅអាមេរិក។

នៅថ្ងៃទី​១ ខែមិថុនា អតីតអនុប្រធានាធិបតីអាមេរិក លោក Joe Biden បានសន្យាជាមួយថ្នាក់ដឹកនាំ មានដើមកំណើតអាហ្វ្រិក នៅតាមបណ្តារដ្ឋ ​ក្នុងនោះមានរដ្ឋ​ Delaware ថា ប្រសិនបើលោក​ជាប់​ឆ្នោត​ជាប្រធានាធិបតីនោះ លោកនឹងដោះស្រាយបញ្ហាប្រកាន់ជាតិសាសន៍ ដែលធ្វើឲ្យប៉ះពាល់យ៉ាងខ្លាំងដល់ក្រុមជនជាតិស្បែកខ្មៅ​។

នៅក្នុងជំនួបជាមួយថ្នាក់ដឹកនាំ អាមេរិក​មានដើមកំណើតអាហ្រ្វិក លោក Joe Biden បានអំពាវនាវដល់​ពលរដ្ឋអាមេរិក មានដើមកំណើតស្បែកខ្មៅ​ បោះឆ្នោតគាំទ្រលោក ដើម្បីទទួលបានសំឡេងភាគច្រើនទាំង ក្នុងរដ្ឋសភា និងព្រឹទ្ធសភា ជាការងាយស្រួលបំផុត ដើម្បីសម្រេចគោលនយោបាយផ្សេងៗ​។ ប្រសិនបើគណបក្សប្រជាធិបតេយ្យ មានសំឡេងភាគច្រើន នៅក្នុងស្ថាប័នសំខាន់ទាំងពីរ ការអនុម័តច្បាប់ គឺជារឿង​ងាយ​ស្រួលបំផុត។

លោក​ Biden បានបញ្ជាក់ទៀតថា «យើងគ្រប់គ្រងរដ្ឋសភា គឺមិនគ្រប់គ្រាន់នោះឡើយ គឺចាំបាច់ត្រូវតែគ្រប់គ្រងទាំងព្រឹទ្ធសភាទៀត ទើបជាការជោគជ័យ»។ លោក Biden នឹងថ្លែងសារស្តីពី​គោលនយោបាយ អនាគត និងកំណត់ទិសដៅរបស់អាមេរិក នៅ​ក្នុងពេលដ៏ខ្លីខាងមុខ៕​ ប្រែសម្រួលដោយ៖ MEO

from： https://tnaot.com/km/m/detail/article/9301829