លោក ដូណាល់ ត្រាំ ប្រធានាធិបតីអាមេរិក​ បានថ្លែង​ កាលពីថ្ងៃទី១ ខែមិថុនា ឆ្នាំ២០២០ថា លោកកំពុងប្រុងប្រៀប​ដាក់ពង្រាយ​​​កម្លាំងទាហានប្រដាប់ដោយ​អាវុធធុនធ្ងន់រាប់រយនាក់ និងកងកម្លាំង​អនុវត្តច្បាប់ផ្សេងទៀត​ ដើម្បីបញ្ឈប់​អំពើហិង្សា ​នៅក្នុងរដ្ឋធានីវ៉ាស៊ីនតោន ​សហរដ្ឋអាមេរិក ។ 

លោក ដូណាល់ ត្រាំ បានប្តេជ្ញាថា លោកនឹងដាក់ពង្រាយយោធា​ដូចគ្នានេះ​ នៅតាមទីក្រុងដទៃផ្សេងទៀត បើសិន​អភិបាលក្រុងទាំងអម្បាលម៉ាន​នោះ ​មិនអាច​គ្រប់គ្រង​បានស្ថានការណ៍ នៅក្នុងដែនសមត្ថកិច្ចរបស់ពួកគេបាន​ទេនោះ ។ 

លោក ដូណាល់ ត្រាំ បានថ្លែងថា «អភិបាលក្រុង​ទាំងនោះ​ ត្រូវតែបង្កើ​តកងកម្លាំង​អនុវត្តច្បាប់​ឲ្យមានវត្តមាន​ រហូតទាល់តែ​អំពើហិង្សា​ ត្រូវបានទប់ស្កាត់បាន» ។ លោកបន្តថា «បើសិន​អភិបាលក្រុងទាំងនោះ នៅតែមិនអាច​ចាត់វិធានការ​ទប់ស្កាត់បាន មិនអាចការពារទ្រព្យសម្បត្តិ​របស់ប្រជាជន​នោះ ខ្ញុំនឹង​ដាក់ពង្រាយ​យោធា​អាមេរិក ដើម្បីឲ្យដោះស្រាយបញ្ហានេះឲ្យបានឆាប់រហ័សជូន​ដល់ប្រជាពលរដ្ឋ» ។ 

គួរបញ្ជាក់ថា រលកបាតុកម្ម​ប្រឆាំង​តវ៉ា​ទាមទារយុត្តិធម៌ ​នៅអាមេរិក​ បានអូសបន្លាយ​ពេលជាង​១សប្តាហ៍​មកហើយ គឺក្រោយពី​ជនជាតិស្បែកខ្មៅ​ម្នាក់ ឈ្មោះ George Floyd អាយុ៤៦ឆ្នាំ ត្រូវប៉ូលិសស្បែកស​យកជង្គង់សង្កត់ក​ រហូតដល់ថប់ដង្ហើមស្លាប់ ​នៅទីក្រុង Minneapolis ។ 

បុរសស្បែកខ្មៅរូបនេះ​ ត្រូវប៉ូលិសចាប់ខ្លួនដាក់ខ្នោះ​ ដោយសារតែ​ចាយក្រដាស​២០ដុល្លារក្លែងក្លាយ​ ​នៅក្នុងហាងលក់គ្រឿងទេសមួយកន្លែង ហើយត្រូវគេប្តឹងឲ្យចាប់ខ្លួន។ 

ការស្លាប់របស់​បុរសស្បែកខ្មៅរូបនេះ បាននាំឲ្យមានរលកបាតុកម្មទ្រង់ទ្រាយធំ​ទាំងយប់-ថ្ងៃ និងរាលដាល​ទៅដល់​ទីក្រុងផ្សេងៗ​ជាច្រើនទៀត ​នៅក្នុងទឹកដីអាមេរិក រហូត​ធ្វើឲ្យលោក ដូណាល់ ត្រាំក្ រពុលមុខជាខ្លាំង ។ 

បាតុកម្ម​ ពេលខ្លះបានផ្ទុះឡើងនូវអំពើហិង្សា រវាង​ក្រុមបាតុករ និងកងកម្លាំងសន្តិសុខ ។ មានការដុតបំផ្លាញ​ទ្រព្យសម្បត្តិសាធារណៈ​ជាដើម ។ ប៉ុន្តែ​មិនមានរបាយការណ៍​អំពីគ្រោះថ្នាក់ដល់អាយុជីវិតនោះទេ បើទោះជាពេលខ្លះ​មានការប្រើប្រាស់អាវុធ ដូចជា ដំបង គ្រាប់បែកផ្សែង​ ឬឧស្ម័នបង្ហូរទឹកភ្នែក​របស់ប៉ូលិសបំបែកក្រុមបាតុករក៏ដោយ៕ ប្រែសម្រួលដោយ៖ thach yat 

from： https://tnaot.com/km/m/detail/article/9301403