Sign In 
មេបុណ្យខាងលិច ជាប្រាសាទបុរាណខ្មែរដែលមានទីតាំងស្ថិតនៅលើដីទួលមួយកន្លែង ចំកណ្ដាលបារាយណ៍ខាងលិច ក្នុងខេត្តសៀមរាប។
ប្រាសាទមេបុណ្យខាងលិច ជាប្រាសាទដ៏ល្អឯកមួយស្ថាបនាឡើងក្នុងសតវត្សទី១១ ក្នុងរាជ្យកាលព្រះបាទឧទយាទិត្យវរ្ម័នទី២ ដើម្បីឧទ្ទិសថ្វាយព្រះវិស្ណុ។ ប្រាសាទនេះ ត្រូវគេចាត់ទុកជាកន្លែងសម្រាប់តម្កល់បល្ល័ង្ក ហើយនៅរដូវវស្សាប្រាង្គប្រាសាទទាំងមូលហាក់ដូចជាកំពុងបណ្ដែតខ្លួនលើផ្ទៃទឹកដ៏ធំល្វឹងល្វើយ។
សំណង់ប្រាសាទផ្សំឡើងដោយកំពែងមួយជាន់ធ្វើអំពីថ្មភក់ ហ៊ុមព័ទ្ធស្រះទឹកធំមួយដែលគេជីកនៅលើដីទួល។ នៅចំកណ្ដាលស្រះទឹកខាងក្នុងមានសំណង់មួយធ្វើអំពីថ្មភក់ ដែលមានរាងមូលដូចជាអណ្ដូងទឹក មានអង្កត់ផ្ចិតប្រហែល ៣ម៉ែត្រ។ តាមរយៈកំណាយនៅឆ្នាំ១៩៣៩ គេរកឃើញរូបបដិមាមួយគឺព្រះវិស្ណុផ្ទំបច្ចុប្បន្នរក្សាទុកនៅសារមន្ទីរជាតិ។
ឯកសារកត់ត្រាដោយលោក ជីវ តាក្វាន់ ជាបេសកជននៃចក្រភពចិនដែលបានមកដល់រាជធានីអង្គរអំឡុងឆ្នាំ១២៩៥ បានបញ្ជាក់ថា ប្រាសាទមេបុណ្យខាងលិច ត្រូវបានស្ថាបនាឡើងស្របតាមអត្ថន័យនៃរឿងកំណើតព្រះព្រហ្ម៕
