ការឆ្លងរាលដាលពី​វីរុស​កូវីដ​១៩ នៅក្នុងប្រទេសកូរ៉េខាងត្បូង​មិនទាន់ថយចុះមែនទែននោះទេ ។ ជាក់ស្តែង​នៅថ្ងៃទី១ ខែមិថុនា ឆ្នាំ២០២០ គេបានរកឃើញ​ករណីថ្មីសរុប​៣៥នាក់ ខណៈដែលអ្នកបាត់បង់ជីវិត​ថ្មី​ថែម១នាក់ទៀត ។ 

ប្រភពព័ត៌មានរបស់បណ្តាញទូរទស្សន៍ Arirang បានផ្សាយថា ក្នុងចំណោម​៣៥ករណីនោះ, ៣០នាក់​គឺការឆ្លង​នៅក្នុងសហគមន៍ រួមមាន ១៨ករណីឆ្លងនៅ​ទីក្រុងអ៊ីនឈុន (Incheon)… និង​១១ករណី​រកឃើញនៅក្នុងខេត្ត Gyeonggido ។ ចំណែក​៥ករណី នាំមកពីប្រភពខាងក្រៅ ។ 

ប្រទេសនេះ មានឆ្លងសរុប​កើនដល់ ១១ ៥០៣ នាក់ ។ ចំណែកករណីស្លាប់ថ្មី​ថែមមួយនាក់ទៀត ធ្វើឲ្យអ្នកស្លាប់សរុប​កើនដល់​ ២៧១ នាក់ ។ 

ពលរដ្ឋនៅកូរ៉េខាងត្បូង​ឆ្លងកាត់ការធ្វើតេស្ត​ជាង​២៤ពាន់នាក់ ។ អ្នកជំងឺ​បន្ថែម​១៧នាក់​បានជាសះស្បើយចាកចេញពីមន្ទីរពេទ្យ ។ អ្នកដែលជាសះស្បើយពីជំងឺកូរីដ​១៩នៅក្នុងប្រទេសនេះ ​សរុប ១០ ៤២២ នាក់ ។ 

ចាប់ពីថ្ងៃទី១ ខែមិថុនា ឆ្នាំ២០២០នេះទៅ ទីតាំងដែលប្រឈម​ការឆ្លងរាតត្បាតពីកូវីដ​១៩បំផុត ដូចជា នៅតាម​ក្លឹបរាត្រី, បន្ទប់ចម្រៀង ជាដើមនោះ ​តម្រូវឲ្យប្រើប្រាស់​កូដ QR សម្រាប់​ស្កែនភ្ញៀវ​ដែលចេញ​-ចូល​ទីនោះ​ ជាផ្នែក​មួយ​តាមដាន ក៏ដូចគ្រប់គ្រង​ជំងឺ​កូវីដ​១៩ ។ 

គួរលើកមកជម្រាបជូនថា គិតត្រឹមថ្ងៃទី១ ខែមិថុនា ឆ្នាំ២០២០ អ្នកជំងឺ​កូវីដ​១៩ នៅ​ជុំវិញពិភពលោក ​បានកើនជាង ៦,២ លាននាក់ ក្នុងនោះបាត់បង់ជីវិត​ ៣៧៤ ១៥៨ នាក់ ។ ប៉ុន្តែអ្នកជំងឺជាង ២,៨ លាននាក់​បានជាសះស្បើយវិញផងដែរ ៕ ប្រែសម្រួលដោយ៖ thach yat

from： https://tnaot.com/km/m/detail/article/9294577