Sign In 
ឥណ្ឌាក្លាយជាប្រទេសទីមួយ ក្នុងតំបន់អាស៊ី ដែលមានចំនួនអ្នកឆ្លងកូវីដ១៩ ច្រើនជាងគេ និងជាប្រទេសស្ថិតនៅលំដាប់ទី៧ នៅលើពិភពលោក ពីចំនួនអ្នកឆ្លង។ ក្រុមអ្នកឯកទេស បានលើកឡើងថា ក្នុងពេលដ៏ខ្លីខាងមុខ ឥណ្ឌា នឹងក្លាយជាសម្បុកកូវីដ១៩ ថ្មី បើទប់ស្កាត់មិនបានល្អ។
គិតដល់ម៉ោង៧ និង៣០នាទីព្រឹក ថ្ងៃទី១ ខែមិថុនា នៅលើពិភពលោក មានអ្នកឆ្លងកូវីដ១៩ កើនឡើងដល់ទៅ ៦ ២៥៩ ២៤៨នាក់ ក្នុងនោះមានអ្នកឆ្លងថ្មី ក្នុងរយៈពេល២៤ម៉ោង មានដល់ទៅ ១០៨ ៧៦៦ នាក់ ។ ជាមួយគ្នានេះ មានអ្នកស្លាប់កើនឡើងដល់ ៣៧៣ ៦៩៧នាក់ ក្រៅពីនេះក៏មានអ្នកជាសះស្បើយ ២ ៧៨៥ ៦៧៤នាក់ផងដែរ។
ឥណ្ឌា ជាប្រទេសមានពលរដ្ឋច្រើនជាងគេបំផុតលំដាប់ទីពីរ នៅលើពិភពលោក កំពុងប្រឈមនឹងការឆ្លងរាលដាលកូវីដ-១៩ខ្លាំងឡើង អាចក្លាយជាសម្បុកកូវីដ-១៩ ក្នុងពេលឆាប់ៗខាងមុខនេះ។ នាយករដ្ឋមន្ត្រី ឥណ្ឌា លោក Narendra Modi កាលពីថ្ងៃទី៣១ ខែឧសភា បានប្រកាសថា ពលរដ្ឋឥណ្ឌាចាំបាច់ត្រូវតែបង្កើនការប្រុងប្រយ័ត្នឲ្យបានខ្ពស់បំផុត ដោយចំនួនអ្នកឆ្លងកើនឡើងជាថ្មី។
ក្រសួងសុខាភិបាលឥណ្ឌា កាលពីថ្ងៃទី៣១ ខែឧសភា ក៏បានប្រកាសផងដែរថា ចំនួនអ្នកឆ្លងកូវីដ-១៩ ក្នុងរយៈពេល២៤ម៉ោង កន្លងមក មានដល់ទៅ៨.៣៨០ នាក់ ធ្វើឲ្យចំនួនអ្នកឆ្លងសរុប កើនឡើងដល់ ១៨២.១៤៣នាក់ និងមានអ្នកស្លាប់កើនឡើងដល់៥.១៦៤ នាក់។
នាយករដ្ឋមន្ត្រីឥណ្ឌា លោក ម៉ូឌី បានបញ្ជាក់ថា «សង្គ្រាមប្រឆាំងនឹងកូវីដ-១៩ កាន់តែតានតឹង យើងមិនត្រូវធ្វេសប្រហែសឡើយ។ នៅពេលនេះ រដ្ឋាភិបាលក៏បានសម្រេចពន្យារពេលច្បាប់គ្រានអាសន្ន រហូតដល់ថ្ងៃទី៣០ ខែមិថុនា ។ ទន្ទឹមនឹងនេះដែរ លោកនាយករដ្ឋមន្រ្ដីក៏បានអនុញ្ញាតឲ្យភោជនីយដ្ឋាន ព្រះវិហារបើកទ្វារឡើងវិញ នៅថ្ងៃទី៨ ខែមិថុនា ប៉ុន្តែត្រូវតែគោរពទៅតាមច្បាប់គម្លាតសង្គម និងការពារខ្លួនឲ្យបានល្អបំផុត៕ ប្រែសម្រួលដោយ៖ MEO
