មហាអំណាចពិភពលោក​កំពុងតែប្រជែងគ្នា​អភិវឌ្ឍណ៍​តម្រូវការវ៉ាក់សាំង​ដាច់ដោយឡែកផ្សេងពីគ្នា​ ដើម្បី​ប្រឆាំង​វីរុស​កូវីដ​១៩ ។ មុននេះ សាកលវិទ្យាល័យ Oxford ចក្រភពពង់គ្លេស​បញ្ជាក់ថា ខ្លួនមានទំនុកចិត្តខ្ពស់​​នៅក្នុង​ការបង្កើត​វ៉ាក់សាំង​បានមុនដំបូងគេព្យាបាលកូវីដ​១៩ ។ ប៉ុន្តែ​នាពេលឥឡូវនេះ ក្រុមហ៊ុនជីវ​បច្ចេកវិទ្យាចិន​ ហាក់កំពុងនាំមុខវិញម្តង ។ 

គេហទំព័រ​ Sky News បានផ្សាយ​កាលពីថ្ងៃទី​៣១ ខែឧសភា ឆ្នាំ២០២០ថា ក្រុមអ្នកស្រាវជ្រាវចិន​កំពុងអភិវឌ្ឍន៍​សាកល្បងវ៉ាក់សាំង​មួយប្រភេទប្រឆាំងកូវីដ​១៩ ហើយ​ពិតប្រាកដណាស់ថា ​«៩៩ភាគរយ» ​ត្រូវបានគេមានជំនឿចិត្ត​ថា វ៉ាក់សាំងនេះ អាចឈ្នះ​លើវីរុស​ដ៏កាចសាហាវកូវីដ​១៩នោះបាន ។ 

ប្រភពបានបញ្ជាក់ថា ប្រព័ន្ធផ្សព្វផ្សាយ​របស់ចក្រភពអង់គ្លេសដំបូងគេ​​ត្រូវបានអនុញ្ញាត​ឲ្យទៅកាន់មន្ទីរពិសោធន៍​​ ទីដែលវ៉ាក់សាំង​កំពុង​ត្រូវបានអភិវឌ្ឍន៍ ។ ប្រព័ន្ធផ្សព្វផ្សាយនេះ បានបញ្ជាក់ថា ក្រុមស្រាវជ្រាវ Sinovac មូលដ្ឋាននៅទីក្រុងប៉េកាំង​បានអះអាងថា នៅក្នុងដំណាក់កាលនេះ ខ្លួនកំពុងដំណើរការសាកល្បងដំណាក់កាល​ទី២ ទៅលើវ៉ាក់សាំង ដែលបានអភិវឌ្ឍន៍ថ្មីរបស់ខ្លួន ។ មនុស្សជាង​១ពាន់នាក់​បានចូលរួម​ការសាកល្បង​តេស្តវ៉ាក់សាំងថ្មីនេះ ។ 

អ្នកស្រាវជ្រាវ Luo Baishan នៅពេលត្រូវបានសាកសួរថា តើ​លោកគិតថា វ៉ាក់សាំងនេះ​នឹងទទួលបានជ័យជំនះ​ដែរឬយ៉ាងណា គាត់ឆ្លើយថា «បាទ! បាទ!។ វានឹងទទួលបានជោគជ័យ…៩៩ភាគរយ​យ៉ាងពិតប្រាកដ» ។

វ៉ាក់សាំង​នេះ​ត្រូវបានដាក់ឈ្មោះថា CoronaVac គឺបានប្រឆាំងមេរោគ​យ៉ាងមានប្រសិទ្ធភាព​ ខណៈសាកល្បង​ធ្វើតេស្ត​ទៅលើសត្វស្វា ។

លទ្ធផលស្រាវជ្រាវ​ដែលផ្សព្វផ្សាយ​ដោយ Sinovac បានបញ្ជាក់ថា ក្រុមអ្នកស្រាវជ្រាវនៅ Sinovac Biotech ដែលមានទីស្នាក់ការកណ្តាលនៅទីក្រុងប៉េកាំងបានចាក់វ៉ាក់សាំងការពារកូវីដ១៩នេះ ចំនួនពីរផ្សេងគ្នា ទៅលើសត្វស្វាចំនួន៨ដង ។ គេបានចាក់វីរុស SARS-CoV-2 ចូលទៅក្នុងសួតរបស់សត្វស្វាតាមរយៈបំពង់ខ្យល់ ប៉ុន្តែគ្មានសត្វស្វាណាមួយមានការឆ្លងមេរោគធ្ងន់ធ្ងរទេ ។  

ប្រភពបន្តថា “សត្វស្វាដែលបានចាក់វ៉ាក់សាំងខ្ពស់ បានបង្ហាញនូវលទ្ធផលឆ្លើយតបល្អបំផុត ។ ប្រាំពីរថ្ងៃបន្ទាប់ពីសត្វស្វាបានទទួលវីរុស អ្នកស្រាវជ្រាវមិនអាចរកឃើញវីរុសនោះនៅក្នុងសរសៃឈាមសួត ឬសួតរបស់សត្វស្វាទាំងនោះទេ ។ 

ក្រុមអ្នកស្រាវជ្រាវបានបន្ថែមថា សត្វដែលមានដង់ស៊ីតេទាបខ្លះមាន “ស្នាមជាំ” ប៉ុន្តែវាក៏អាចគ្រប់គ្រងការឆ្លងបានដែរ ។

ទោះយ៉ាងណាក៏ដោយ ក្រុមស្រាវជ្រាវ Sinovac នៅត្រូវការធ្វើតេស្តវ៉ាក់សាំងនេះទៅលើមនុស្សផ្សេងទៀត ។ ការធ្វើតេស្ត​វ៉ាក់សាំងនេះ ធ្វើឡើងរយៈពេល​៣ដំណាក់កាល ហើយអាច​ធ្វើតេស្តនៅក្រៅប្រទេសចិនផងដែរ មុនពេល​សម្រេច​ជាផ្លូវការពីរដ្ឋាភិបាល ។ គេបានបញ្ជាក់ថា ដំណើរការវិវឌ្ឍន៍​របស់វ៉ាក់សាំង​រហូតមកដល់ពេលនេះ គឺបានល្អប្រសើរខ្លាំងណាស់ ៕ ប្រែសម្រួលដោយ៖ thach yat 

from： https://tnaot.com/km/m/detail/article/9286561