ក្រុងPattaya នឹងបើកដំណើរការ​​ឆ្នេរខ្សាច់​នៅក្នុងក្រុងឡើងវិញចាប់ពីថ្ងៃចន្ទនេះតទៅ ដែលក្នុងនោះ​ក៏មាន​កោះ​ Lan ផងដែរ ព្រោះ​ច្បាប់រឹតបន្តឹងក្នុងប្រទេសត្រូវបានបន្ធូរបន្ថយដោយសារចំនួនអ្នកឆ្លងមេរោគកូវីដ-១៩បានថយចុះ។

លោក Sonthaya Khunplome​អភិបាលក្រុងនៃ​ខេត្តChon Buri បាន​មានប្រសាសន៍កាលពីថ្ងៃសុក្រថា អ្នកធ្វើដំណើរកម្សាន្តតាមឆ្នេរខ្សាច់នៅ​​រមណីយដ្ឋានទាំងអស់ក្នុងខេត្ត​ Chon Buri អាចជួលកៅអីនិងឆត្របាន ប៉ុន្តែ​ក្រុមការងារនៅតាមរមណីយដ្ឋានត្រូវតែពង្រឹងវិធានការរក្សាគម្លាត​ដោយរក្សាចម្ងាយយ៉ាងតិចមួយម៉ែត្រពីគ្នា។​ លោកបានបន្ថែមថាឆ្នេរខ្សាច់នឹងត្រូវបិទរៀងរាល់​ថ្ងៃអង្គារដល់ថ្ងៃព្រហស្បតិ៍នៅសប្តាហ៍ទី២ ឬទី៣ ក្នុងមួយខែជំនួសឱ្យការបិទឆ្នេររាល់ថ្ងៃពុធដើម្បីសម្អាតមុនការបិទដំណើរការ។ 

រូបតំណាង

ទីក្រុង​ Pattaya ក៏បានបង្ហោះសារតាមបណ្តាញសង្គមហ្វេសប៊ុកផងដែរ ដោយប្រកាសថានឹងបើកដំណើរការឆ្នេរសមុទ្រឡើងវិញនៅថ្ងៃចន្ទនេះ ​ដែលក្នុងនោះ​កោះ​ Lan ​ដែល​ជាកោះមួយ​មានការពេញនិយមពីសំណាក់អ្នក​ទេសចរណ៍ក៏ត្រូវបានអនុញ្ញាតឱ្យបើកដំណើរការវិញផងដែរ។ ទោះជាយ៉ាងណាក៏ដោយ​ផ្ទះសំណាក់នៅលើកោះ​មិនទាន់ត្រូវបានអនុញ្ញាតឱ្យបើកដំណើរការនៅឡើយទេ។ ទីក្រុង Pattaya បានប្រកាសបិទឆ្នេរទាំងអស់នៅថ្ងៃទី៩ ខែឧសភា ដើម្បីជួយកាត់បន្ថយការរីករាលដាលនៃមេរោគកូវីដ-១៩។ កោះ Lan ​បានឈប់ដំណើរការតាំងពីថ្ងៃទី២៥ ខែមីនា។

រូបតំណាង

​ខេត្តChun Buriមិនបានរាយការណ៍អំពីអ្នកឆ្លងមេរោគកូវីដ-១៩ ថ្មីទេចាប់តាំងពីថ្ងៃទី២៣ ខែឧសភា។ ចាប់តាំងពីមាន​ការរាតត្បាតនៃមេរោគដ៏កាចសាហាវនេះមកទល់ពេលនេះ​ ខេត្តChun Buri​ ត្រូវបានគេរាយការណ៍​ថាមានអ្នកឆ្លងជំងឺចំនួន ៨៧ នាក់ ក្នុងនោះមាន ៤១នាក់នៅក្នុងស្រុក Bang Lamung នៃក្រុង Pattaya។ 

កែសម្រួលដោយ៖ ភារ៉ា

ប្រភព៖ Bangkok Post

from： https://tnaot.com/km/m/detail/article/9277810