ក្រុមហ៊ុនផលិតរថយន្តនៅវៀតណាម VinFast បានចាប់ផ្តើម​បើកសាកល្បង​​ម៉ូដែលរថយន្តអគ្គីសនី​ដំបូងបំផុត​​​របស់ខ្លួន​នៅទីក្រុងហាណូយ មុនពេលគម្រោង​នាំយកទៅដាក់តាំងពិព័រណ៍​ក្នុងទឹកដីអាមេរិក​ នៅចុងឆ្នាំ២០២០នេះ ។ 

រថយន្ត Crossover ត្រូវបានគ្របក្រណាត់ជិត ​ចៀសវាង​ការបែកធ្លាយរូបរាង ខណៈដែលវាកំពុង​តែចរាចរសាកល្បង​ កាលពីថ្ងៃទី​២៨ ខែឧសភា ឆ្នាំ២០២០ ។ រថយន្តនេះ​ មានបិទស្លាកអក្សរ “VinFast Nextgen”នៅពីចំហៀងរថយន្តផងដែរ ។ 

ក្រុមហ៊ុនផលិតរថយន្ត VinFast មានគម្រោងដាក់បង្ហាញរថយន្តនេះ​នៅ​ក្នុងព្រឹត្តិការពិព័រណ៍រថយន្ត​ ក្នុងខែវិច្ឆិកា ឆ្នាំ២០២០ ស្ថិតនៅរដ្ឋ ឡូសអេនចឺឡេស សហរដ្ឋអាមេរិក នៅមុនពេលដែល​ក្រុមហ៊ុននេះ​ផ្សព្វផ្សាយ​ឲ្យទូលំទូលាយ​ទៅកាន់បណ្តាប្រទេសដទៃផ្សេងៗទៀត​ ពាស់ពេញពិភពលោក​ នៅខែ​មករា ឆ្នាំ២០២១ ។ ខែកក្កដា ឆ្នាំ២០២១ VinFast​មានគម្រោងផលិត​រថយន្តម៉ូដែលនេះ​ចំនួន​ច្រើនគ្រឿង​។ 

ប្រភព VNExpress ផ្សាយថា រថយន្តអគ្គីសនីនេះ​រចនាម៉ូដ​ដោយក្រុមហ៊ុន​រថយន្តអ៊ីតាលី Pininfarina ។ ក្រុមហ៊ុនអ៊ីតាលីនេះ​ ក៏ជាអ្នករចនា​ម៉ូដ​ឲ្យរថយន្ត SUV និង Sedan របស់ក្រុមហ៊ុន VinFast ផងដែរ ។ 

រថយន្តអគ្គីសនី​នេះ មានកម្លាំង​ម៉ាស៊ីន ៤៧០ សេះ រត់បាន​៥០០គីឡូម៉ែត្រ​នៅពេលសាក​អាគុយពេញ ។ ក្រុមហ៊ុន​ផលិតរថយន្ត VinFast បាននិងកំពុងផលិត​អាគុយផ្ទាល់ខ្លួន​សម្រាប់ប្រើប្រាស់ជាមួយ​កោសិកា​មកពីក្រុមហ៊ុន ​LG កូរ៉េខាងត្បូង ។ 

រថយន្តម៉ូដែលនេះ​ក៏មានប្រភេទ​ប្រើប្រេងសាំងផងដែរ ដែលបំពាក់ជាមួយម៉ាស៊ីន BMW ។

ក្រុមហ៊ុន VinFast បានចាប់ផ្តើម​ចែកចាយ​រថយន្តដំបូងបំផុត​របស់ខ្លួន​កាលពីខែមិថុនា ឆ្នាំ២០១៩ ។ ក្រុមហ៊ុននេះ ​មិនបាន​​បញ្ចេញតួលេខពិតប្រាកដ​​ថា រថយន្តប៉ុន្មានគ្រឿង​ដែលបានលក់ដាច់នោះឡើយ ។ យ៉ាងណាក៏ដោយ ទិន្នន័យផ្លូវការ​បង្ហាញថា រថយន្តរបស់ VinFast ចំនួន ​៥ ១២៤ គ្រឿង​ត្រូវបានចុះបញ្ជី​នៅក្នុង​ឆមាស​ទីមួយនេះ ។ ដូច្នេះ ការលក់របស់VinFast ​ឈរនៅលំដាប់លេខរៀងទី​៥ បន្ទាប់​ពីរថយន្ត​ក្រុមហ៊ុន ហ៊ីយ៉ាន់ដាយ, តូយ៉ូតា, កៀ និងហុងដា ៕ ប្រែសម្រួលដោយ៖ thach yat

from： https://tnaot.com/km/m/detail/article/9275955