ប្រសិនបើ ក្លិប Barcelona គ្មានលទ្ធភាពទិញផ្តាច់កិច្ចសន្យារបស់កីឡាករ Lautaro Martinez នៅរដូវក្តៅនេះទេ នោះក្លិប Inter នឹងមិនលក់ខ្សែប្រយុទ្ធរូបនេះឱ្យជាដាច់ខាត។ នេះបើយោងតាមការអះអាងពី លោក Piero Ausilio នាយកផ្នែកកីឡារបស់ ក្លិប Inter។

កីឡាករ Martinez ជាខ្សែប្រយុទ្ធជួរមុខរបស់ ក្លិប Inter ត្រូវបានផ្សារភ្ជាប់នឹងការផ្លាស់ទៅកាន់ ក្លិប Barcelona នៅរដូវក្តៅ ដោយមានការអះអាងថាកីឡាករជម្រើសជាតិអាហ្សង់ទីនរូបនេះ នឹងក្លាយជាអ្នកដែលអាចទៅជំនួសតំណែងលេងខ្សែប្រយុទ្ធ Luis Suarez បាននៅពេលអនាគត។

ដូចបានដឹងស្រាប់ហើយថា បច្ចុប្បន្ននេះ ក្លិបបាល់ទាត់មួយចំនួនកំពុងជួបបញ្ហាផ្នែកហិរញ្ញវត្ថុជាខ្លាំង ក្នុងអំឡុងពេលមានការផ្ទុះឡើងនូវមេរោគកូវិដ-១៩ ខណៈពេលដែលក្លិបធំៗជាច្រើនមានតម្រូវការផ្នែកទីផ្សារដោះដូរកីឡាករផងដែរ។ ទន្ទឹមនឹងនេះផងដែរ ក្លិប Barcelona កំពុងចង់បានខ្សែប្រយុទ្ធ Martinez របស់ក្លិប Inter ដើម្បីរៀបចំតំបន់ខាងលើដែលមានការខ្វះខាត សម្រាប់ត្រៀមរដូវកាលថ្មី។ ទាក់ទងនឹងបញ្ហានេះ ពួកគេ​ក៏កំពុងត្រៀមបញ្ចេញកីឡាករក្នុងក្លិបមួយចំនួន ដើម្បីប្រមែប្រមូលប្រាក់ខ្លះយកទៅទិញខ្សែប្រយុទ្ធដែលកំពុងឡើងជើងខាងលើផងដែរ។

កីឡាករ Arturo Vidal, Nelson Semedo, Samuel Umtiti និង Ivan Rakitic សុទ្ធសឹងត្រូវបានគេចាត់ទុកថាជាកីឡាករដែលអាចនឹងត្រូវចាកចេញនៅរដូវក្តៅ ចំពេលដែលក្លិបកំពុងមានតម្រូវការ។

យ៉ាងណាមិញ ក្នុងពេលជាមួយគ្នានេះដែរ លោក Ausilio បាននិយាយប្រាប់ទូរទស្សន៍ Sky Sport ថា ” Barcelona ជាក្លិបដែលបានទាក់ទងមកពួកយើង ទំនាក់ទំនង់ពួកយើងជាមួយពួកគេគឺល្អ ប៉ុន្តែយើងមិនចង់លក់ Martinez ទេ “។

លោកបានបន្តទៀតថា “ប្រសិនបើ Barca ចង់បាន Martinez ពួកគេត្រូវតែហ៊ានចំណាយប្រាក់ទិញផ្តាច់កុងត្រាដែលនៅសល់ “។

គួរបញ្ជាក់ផងដែរថា កុងត្រារបស់ខ្សែប្រយុទ្ធ Martinez នៅមានសុពលភាពជាមួយក្លិប Inter រហូតដល់ឆ្នាំ២០២៣ ហើយមានទឹកប្រាក់ ១១១លានអឺរ៉ូ ជាមួយកិច្ចសន្យានៅក្នុងក្លិប៕

កែសម្រួលដោយ៖ ភារ៉ា

ប្រភព៖ livescore

from： https://tnaot.com/km/m/detail/article/9273840