Sign In 
ប៉ូលិសហុងកុង កាលពីថ្ងៃទី២៧ ខែឧសភា បានចាប់ខ្លួនបាតុករប្រហែល៣៦០នាក់ ក្នុងចំណោមរាប់ពាន់នាក់ ដែលដង្ហែក្បួនបាតុកម្ម តាមដងមហាវិថីនានា ប្រឆាំងនឹងច្បាប់សន្តិសុខជាតិហុងកុងរបស់ទីក្រុងប៉េកាំង ។ នេះបើតាមការផ្សាយរបស់ប្រភព CBC កាលពីថ្ងៃទី២៧ ខែឧសភា ។ 
បាតុករកុងហុងរាប់ពាន់នាក់បាននាំគ្នាប្រឆាំងនឹងច្បាប់សន្តិសុខជាតិហុងកុងរបស់ចិន ដោយអះអាងថា នេះជាវិធានការមួយប៉ះពាល់យ៉ាងខ្លាំងដល់ស្វ័យភាព និងសិទ្ធិសេរីភាពរបស់ដែនដីហុងកុង ។ ទីក្រុងហុងកុង ត្រូវបានអង់គ្លេស ប្រគល់សងចិនវិញ នៅក្នុងឆ្នាំ១៩៩៧ ក្រោមកិច្ចព្រមព្រៀងផ្តល់ស្វ័យភាព និងសិទ្ធិសេរីភាពដល់ទីក្រុងនេះ រយៈពេល៥០ឆ្នាំ ។ ការទទួលសិទ្ធិស្វ័យភាពពិសេសនេះ ក៏មានចែងនៅក្នុងច្បាប់របស់អាមេរិកផងដែរ ។
ប៉ូលិសហុងកុង បានបំបែកហ្វូងបាតុករ និងចាប់ខ្លួនជាបន្តបន្ទាប់ ។ ប៉ុន្តែយ៉ាងនេះក៏ដោយ ក្រុមបាតុករប្រឆាំងនឹងច្បាប់សន្តិសុខជាតិហុងកុងរបស់ចិន នៅតែជម្នះតស៊ូ ធ្វើបាតុកម្មដដែល។ 
ច្បាប់សន្តិសុខជាតិហុងកុងដែលស្នើ ដោយទីក្រុងប៉េកាំង កាលពីថ្ងៃទី២២ ខែឧសភា ឆ្នាំ២០២ នោះ មានគោលបំណងដោះស្រាយបញ្ហាការធ្វើអបគមន៍ ការបះបោរ និងសកម្មភាពភេរកម្ម ។ ជាមួយនេះ ច្បាប់នោះ ក៏នឹងរារាំងគ្រប់ទម្រង់ទាំងអស់ និងរាល់សកម្មភាពជ្រៀតជ្រែកពីបរទេស ចូលក្នុងកិច្ចការរបស់ហុងកុង ។ លោកស្រី Carrie Lam កាលពីថ្ងៃទី២៦ ខែឧសភា បានថ្លែងថា សំណើច្បាប់សន្តិសុខជាតិនេះ មិនប៉ះពាល់ដល់សិទ្ធិសេរីភាពហុងកុងនោះឡើយ ។ 
កាលពីថ្ងៃទី២៧ ខែឧសភា ឆ្នាំ២០២០ រដ្ឋមន្ត្រីក្រសួងការបរទេសអាមេរិក លោក Mike Pompeo បានថ្លែងថា សហរដ្ឋអាមេរិកលែងចាត់ទុកហុងកុងថា ជាតំបន់ស្វយ័តពីប្រទេសចិន ដែលនៅសេសសល់នោះទៀតហើយ។ 
ប្រធានាធិបតីអាមេរិក លោក ដូណាល់ ត្រាំ បានព្រមានថា ទីក្រុងហុងកុង អាចនឹងបាត់បង់ឋានៈជាមជ្ឈមណ្ឌលហិរញ្ញវត្ថុពិភពលោក បើសិនជាច្បាប់ស្តីពីសន្តិសុខជាតិថ្មីរបស់ចិន ត្រូវបានដាក់ឲ្យអនុវត្តនៅលើទីក្រុងហុងកុងមែននោះ ។ អាមេរិកក៏បានព្រមានថា ប្រតិបត្តិកម្មខ្លាំងក្លាមួយឆ្លើយតបចិន ពាក់ព័ន្ធទៅលើបញ្ហាមួយនេះ ក៏នឹងត្រូវធ្វើឡើងនៅពេលខាងមុខឆាប់ៗ ហើយខណៈដែលចិន ហាក់បានដឹងខ្លួន និងត្រៀមលក្ខណៈរួចជាស្រេចដើម្បីតប់តវិញផងដែរ ៕ ប្រែសម្រួលដោយ៖ thach yat
