Sign In 
កូរ៉េខាងជើង បានបិទប្រទេសមុនគេ ដើម្បីទប់ស្កាត់ឆ្លងរាលដាលកូវីដ១៩ ហើយរហូតមកទល់ពេលនេះ នៅមិនទាន់បើកទ្វារនៅឡើយ។ ទាំងនោះហើយ បានបង្កផលលំបាកយ៉ាងខ្លាំងដល់បណ្តាស្ថានទូត ប្រចាំនៅទីក្រុងព្យុងយ៉ាង ដោយពិបាកក្នុងការផ្លាស់ប្តូរបុគ្គលិក។ កន្លងមក ប្រទេសមួយចំនួន ក៏បានសម្រេចបិទទ្វារស្ថានទូត ក្នុងនោះមានបារាំង ក៏បានបិទទ្វារ ហើយដកបុគ្គលិកចេញផងដែរ។
អគ្គរដ្ឋទូតអង់គ្លេស ប្រចាំនៅកូរ៉េខាងជើង បានសម្រេចបិទទ្វារជាបណ្តោះអាសន្ន ចាប់ពីថ្ងៃទី២៧ ខែឧសភា ហើយបុគ្គលិកទាំងអស់ ក៏បានចាកចេញពីកូរ៉េខាងជើងផងដែរ។ ឯកអគ្គរាជទូតអង់គ្លេស នៅកូរ៉េខាងជើង លោក Colin Crooks បានប្រកាសឲ្យដឹងថា នឹងចាកចេញពីកូរ៉េខាងជើង នៅថ្ងៃទី២៨ ខែឧសភានេះ។
អគ្គរដ្ឋទូត Colin Crooks បានសរសេរនៅលើបណ្តាញសង្គម Twitter ថា ស្ថានទូតអង់គ្លេសប្រចាំទីក្រុងព្យុងយ៉ាង បានសម្រេចបិទទ្វារជាបណ្តោះអាសន្ន ហើយបុគ្គលិកត្រូវចាកចេញពីទីក្រុងព្យុងយ៉ាងផងដែរ។
បើតាមសេចក្តីប្រកាសរបស់ការិយាល័យទំនាក់ទំនងកិច្ចការបរទេសអង់គ្លេស បានបញ្ជាក់ថា ការសម្រេចបិទទ្វារ ស្ថានទូតដោយសារតែការកាត់បន្ថយការធ្វើដំណើរទៅកាន់កូរ៉េខាងជើង ធ្វើឲ្យអង់គ្លេសមិនអាចផ្លាស់ប្តូរបុគ្គលិកស្ថានទូតបាន។ ប៉ុន្ដែទោះជាយ៉ាងណា អង់គ្លេសនៅតែរក្សាទំនាក់ទំនងការបរទេសជាមួយកូរ៉េខាជើង ដដែល ហើយនិងជំរុញឲ្យបើកស្ថានទូត ដំណើរការឡើងវិញ ក្នុងពេលឆាប់ៗខាងមុខ៕ ប្រែសម្រួលដោយ៖ MEO
