ប្រិយមិត្ត Anarchak ប្រាកដជាដឹងហើយថាប្រទេសចិនត្រូវបានចាត់ទុកជាមហាយក្សមួយរបស់តំបន់ និងពិភពលោកដោយសារតែចំនួនប្រជាជនច្រើនលើសលុបដាច់គេ សេដ្ឋកិច្ចដ៏ធំនិងសកម្មខ្លាំង និងអំណាចយោធា ក៏ដូចជានយោបាយដ៏មានឥទ្ធិពល។

ថ្ងៃនេះយើងសូមបង្ហាញជូនប្រិយមិត្តនូវចំណុច ៨ ប្លែកៗទាក់ទងប្រទេសនៅអាស៊ីបូព៌ាមួយនេះ៖

១. ថ្ងៃឈប់សម្រាកឬបុណ្យជាតិមិនមែនជាថ្ងៃល្អសម្រាប់ទេសចរបរទេសឡើយ៖

ថ្ងៃឈប់សម្រាកឬបុណ្យជាតិរបស់ប្រទេសចិនជាថ្ងៃដែលមានសភាពតែនតាប់កកស្ទះខ្លាំងបំផុតលើដងផ្លូវ។ ទេសចរបរទេសទាំងឡាយគួរពិចារណាកុំទៅក្នុងអំឡុងពេលនោះអីបើមិនចាំបាច់។ ដូចនេះកុំភ្លេចឆែកមើលឱ្យបានច្បាស់ឬសាកសួរភ្នាក់ងារទេសចរណ៍ពីពត៌មានទាក់ទងនឹងបុណ្យជាតិរបស់ចិន។

២. សំបុត្ររថភ្លើងមានការដណ្ដើមគ្នាទិញដូចព្យុះ៖

ជាទូទៅការកុម្ម៉ុងទិញសំបុត្ររថភ្លើងនៅចិនមានភាពមមាញឹកខ្លាំងណាស់។ ហេតុនេះភ្ញៀវទេសចរ ឬអ្នកដំណើរក្នុងស្រុកក្ដីត្រូវការកុម្ម៉ុងទិញសំបុត្រទុកមុនលឿនតាមដែលអាចទៅបានបើត្រូវធ្វើដំណើរលើរថភ្លើងផ្លូវឆ្ងាយ ហើយអ្នកខ្លះទិញមុនដល់ទៅមួយខែដើម្បីធានាបានកៅអី និងកន្លែងស្រួលអង្គុយ។

៣. នៅចិនពុំមានវប្បធម៌ឱ្យប្រាក់ធីបឡើយ៖

បើសិនជាអ្នកទៅកម្សាន្ដលេងនៅប្រទេសចិនសូមប្រយ័ត្នត្រង់ចំណុចនេះ។ មិនថានៅលើតាក់ស៊ី នៅក្នងភោជនីយដ្ឋាន ឬនៅតាមសណ្ឋាគារក្ដី ការឱ្យលុយធីប ឬលុយទឹកតែ មិនត្រូវបានគេទទួលឡើយហើយក៏អាចត្រូវបានគេចាត់ទុកថាជារឿងមិនសមរម្យផងដែរ។ បើទោះអ្នកព្យាយាមច្រើនជាង ពីរ បីដងក្ដី ក៏គេកម្រនឹងទទួលណាស់។

៤. នរណាបបួលញ៉ាំបាយ អ្នកនោះត្រូវចេញលុយ៖

នៅចិនបើមាននរណាហៅអ្នកញ៉ាំបាយ អ្នកអាចទៅបានដោយមិនចាំបាច់មានប្រាក់មួយសេនក្នុងខ្លួន។ តែបើអ្នកហៅគេ ក៏ត្រូវប្រាកដថាមានលុយគ្រប់គ្រាន់សម្រាប់ប៉ាវគេផងដែរ។ នេះអាចចាត់ទុកជាវប្បធម៌ប្រចាំថ្ងៃមួយទៅហើយ។

៥. ភាសាអង់គ្លេសមិនពេញនិយមទេនៅចិន៖

នៅចិនការប្រើភាសាអង់គ្លេសមិនទាន់ទូលំទូលាយខ្លាំងទេ ហើយពេលខ្លះនៅសណ្ឋាគារក៏មិនប្រាកដមានអ្នកចេះនិយាយភាសសាអង់គ្លេសដែរ។ ហើយពេលខ្លះអ្នកនិយាយមិនចំតុងដូចជនជាតិចិននិយាយពួកគេក៏មិនយល់អ្នកដែរ។ ហើយបើពួកគេចេះនិយាយក៏ពួកគេនិយាយបែបតុងចិនពិបាកស្ដាប់។

៦. ហ្វេសប៊ុក (Facebook) ត្រូវបានហាមឃាត់៖

អ្នកមិនអាចប្រើ Facebook ដោយស្របច្បាប់បានឡើយ គឺនៅទីនេះគេមានបណ្ដាញសង្គម Weibo បង្កើតដោយរដ្ឋាភិបាល។ លើសពីនេះ សូម្បី​ Google, Gmail, Google Maps និង YouTube ក៏ត្រូវបានបិទដែរ។

៧. សណ្ឋាគារខ្លះសម្រាប់តែជនជាតិចិនប៉ុណ្ណោះ៖

បើអ្នកជាជនបរទេស ពេលស្វែងរកសណ្ឋាគារគួរឆែកមុនថា សណ្ឋាគារបើកបម្រើសម្រាប់តែជនជាតិចិន ឬក៏សម្រាប់ជនបរទេសដែរ។

៨. ទឹកក្ដៅអាចរកបានស្ទើរគ្រប់កន្លែង៖

មិនថានៅតាមស្ថានីយ៍រថភ្លើង សួនច្បារ ព្រលានយន្ដហោះ អ្នកអាចស្វែងរកទឹកក្ដៅឆុងតែ និងមីបានជានិច្ច។

យ៉ាងម៉េចដែរប្រិយមិត្ត? ចំណុចណាខ្លះដែលប្លែកសម្រាប់លោកអ្នក? សង្ឃឹមថាអត្ថបទនេះអាចជាប្រយោជន៍សម្រាប់លោកអ្នកដែលចង់ធ្វើដំណើរទៅប្រទេសចិន៕

from： https://tnaot.com/km/m/detail/article/9264382