Sign In 
ប្រទេសថៃ បានផ្តល់ជំនួយថវិកាប្រមាណ២០លានបាត ដើម្បីរួមចំណែកប្រយុទ្ធប្រឆាំងការឆ្លងរាលដាលជំងឺកូវីដ១៩ នៅកម្ពុជា។
តាមរយៈជំនួបនាឱកាសខួប៧០ឆ្នាំ នៃទំនាក់ទំនងការទូតរវាងកម្ពុជា-ថៃ លោកប៉ានយ៉ារ៉ាក់ ពុលថាប់ ឯកអគ្គរាជទូតថៃ ប្រចាំកម្ពុជា បាននាំនូវថវិកាចំនួន២លានបាត ប្រគល់ជូនសម្ដេចតេជោ ដើម្បីជាការចូលរួមចំណែក ទប់ស្កាត់ការប្រយុទ្ធប្រឆាំងនឹងជំងឺកូវីដ១៩។
បើតាមលោក អ៊ាង សុផល្លែតជំនួយការសម្ដេចតេជោ ហ៊ុន សែនបានបញ្ជាក់ប្រាប់អ្នកកាសែត នៅក្រោយជំនួបនេះថា លោកបានធ្វើការជាមួយនឹងបណ្ដាក្រុមហ៊ុនថៃជាច្រើន នៅកម្ពុជា ក្នុងនោះលោកបានណែនាំ មិនឲ្យក្រុមហ៊ុនទាំងនោះ ដំឡើងតម្លៃទំនិញនៅកម្ពុជា។
លោកបញ្ជាក់ថា ក្រុមហ៊ុនទាំងអស់នោះ គួរមានការចែករំលែកនិងប្រើប្រាស់ សម្ភារៈអនាម័យ ដូចជាទឹកលាងដៃ ម៉ាស់ ដើម្បីរួមចំណែកទប់ស្កាត់ ការរីករាលដាលជំងឺកូវីដ១៩ នៅកម្ពុជា។
លោក អ៊ាង សុផល្លែតបានបញ្ជាក់ថា”យើងបានណែនាំឱ្យក្រុមហ៊ុនថៃទាំងអស់នោះ ត្រូវធ្វើយ៉ាងណាគោរពនូវរាល់វិធានការទាំងឡាយ របស់ក្រសួងសុខាភិបាល ដែលបានដាក់ចេញដោយរាជរដ្ឋាភិបាលកម្ពុជា”។
ជាមួយគ្នាផងដែរ ប្រមុខរាជរដ្ឋាភិបាលកម្ពុជាសម្ដេចតេជោ ហ៊ុន សែន បានមានប្រាសាសន៍ថា រាជរដ្ឋាភិបាលថៃ បានចាត់វិធានការយ៉ាងប្រាកដនិយម ដោយក្នុងនោះប្រជាជនកម្ពុជា បានឆ្លងកាត់ព្រំប្រទល់ថៃមកកម្ពុជាជាង៩ម៉ឺននាក់ ហើយជាង៩ ម៉ឺននាក់នេះ ពុំមានជនណាម្នាក់នាំ យកនូវជំងឺកូវីដនោះ ឡើយ។ សម្តេចបានបន្ថែមថា នេះក៏ជាការឆ្លុះបញ្ចាំងមួយ ដែលថាប្រទេសថៃមិនមែន ជាប្រទេសចម្លងមេរោគកូវីដនោះទេ។
សូមបញ្ជាក់ថា តាយរយៈជំនួបខាងលើនេះ ឯកអគ្គរាជទូតកម្ពុជា ប្រចាំនៅប្រទេសថៃ បានធ្វើការអំពាវនាវ និងធ្វើការជាមួយនឹងប្រជាជនកម្ពុជា ដែលកំពុងតែរស់នៅក្នុងប្រទេសថៃ ដោយធ្វើយ៉ាងណាតម្រូវឱ្យអនុវត្តតាមគោលការណ៍ របស់រាជរដ្ឋាភិបាលថៃ ដែលបានចេញជាវិធានការ ដើម្បីទប់ស្កាត់ការរីករាលដាលនិងប្រយុទ្ធប្រឆាំងនឹងជំងឺកូវីដ១៩៕ ដោយ៖ ឃួន លក្ខិណា
