បណ្តាញព័ត៌មានវៀតណាម​បានផ្សាយ​នៅថ្ងៃទី២៦ ខែឧសភា ឆ្នាំ២០២០ថា អាជ្ញាធរវៀតណាម​កំពុងស៊ើបអង្កេតក្រុមហ៊ុន Tenma Vietnam ដែលជាក្រុមហ៊ុនបុត្រសម្ព័ន្ធមួយរបស់ក្រុមហ៊ុនសារជីវកម្ម Tenma ផលិត​ប្ល៉ាស្ទិករបស់ជប៉ុននោះពីបទ​សូកប៉ាន់ ស្មើទំហំទឹកប្រាក់ប្រហែល ២៣៤ ០០០ ដុល្លារ ដើម្បីគេចវេះពីការបង់ពន្ធកាតព្វកិច្ច ។ 

រដ្ឋមន្ត្រីហិរញ្ញវត្ថុវៀតណាម Dinh Tien Dung បានស្នើឲ្យមានការស៊ើបអង្កេតជាបន្ទាន់ ដោយលើកឡើងថា នេះជាបញ្ហាសំខាន់​ទាក់ទង​បរិយាកាសវិនិយោគពាណិជ្ជកម្ម ព្រមទាំងការការពារ​អំពើពុករលួយ ។ 

(លោក Dinh Tien Dung រដ្ឋមន្ត្រីហិរញ្ញវត្ថុវៀតណាម)

ប៉ូលិស​ភាគខាងជើងខេត្ត បាក់ណឹន (Bac Ninh) ទីដែល​ក្រុមហ៊ុន​បានស្ថិតនៅនោះ បានស្នើ​នាយកដ្ឋានគយ និងពន្ធដារ​ខេត្តនេះ ឲ្យ​ផ្តល់នូវឯកសារពាក់ព័ន្ធទាំងអស់​ដើម្បីការស៊ើបអង្កេត ។ 

គួរបញ្ជាក់ថា ស្ថានការ​បានបែកធ្លាយដល់ថ្នាក់នេះ គឺនៅបន្ទាប់ពី​ប្រព័ន្ធផ្សព្វផ្សាយជប៉ុន​បានផ្សាយថា ក្រុមប៊ុនបុត្រសម្ព័ន្ធ​នៅវៀតណាម​នោះ ​បានសូកប៉ាន់​​ប្រហែល​ ២៥​ លានយ៉េន ឲ្យទៅ​មន្ត្រី​គយវៀតណាម ដើម្បីគេចវេះពីការ​បង់ពន្ធ​ប្រហែល ១៨,១​ លានដុល្លារ​ ដែលជាពន្ធកាតព្វកិច្ច​ចាប់ពី​ខែមិថុនា ឆ្នាំ២០១៧ ដល់ខែ​សីហា ឆ្នាំ២០១៩ ។ 

អគ្គនាយក អគ្គនាយកដ្ឋានគយ​ និងពន្ធដារ​ខេត្ត បាក់ណឹន លោក Ngo Xuan Tong បានប្រាប់កាសែត Tuoi Treថា ការចោទប្រកាន់ដែលថា មន្ត្រីគយ និងពន្ធដារ​ទទួលលុយពី​ក្រុមហ៊ុន Tenma Vietnam នោះឆ្លុះបញ្ចាំង​ពីជ្រុងម្ខាង​របស់​សារព័ត៌មានជប៉ុនតែប៉ុណ្ណោះ ។ 

យ៉ាងណាក៏ដោយ ការស៊ើបអង្កេតបន្ថែមកំពុងដំណើរការ ។

គួររំលឹកថា ក្រុមហ៊ុន Tenma Vietnam បង្កើតឡើងក្នុងឆ្នាំ២០០៧ នៅភាគខាងជើង​ខេត្ត Bac Ninh ជាមួយដើមទុន​ប្រហែល​ ៣៥ លានដុល្លារអាមេរិក ។ ក្រុមហ៊ុននេះ​បានសហការពេញលេញពីក្រុមហ៊ុនមេនៅជប៉ុន​ ។ ក្រុមហ៊ុននេះមានជំនាញក្នុងការផលិត​ និងធ្វើពាណិជ្ជកម្មសមាសធាតុប៉្លាស្ទិច និងផ្សិតប្លាស្ទិកជាដើម ៕ ប្រែសម្រួលដោយ៖ thach yat

from： https://tnaot.com/km/m/detail/article/9260899