ស្តេចល្បែងនៅម៉ាកាវ លោក Stanley Ho ដែលបានបង្កើតអាណាចក្រជំនួញមួយ តាំងពីសម័យអតីតអាណានិគមព័រទុយហ្កាល់ ហើយក្លាយជាអ្នកមានជាងគេ នៅអាស៊ីនោះ បានទទួលមរណភាពហើយ កាល ពីថ្ងៃទី២៦ ខែឧសភា ឆ្នាំ២០២០ ក្នុងជន្មាយុ៩៨ឆ្នាំ ។ នេះបើតាមការផ្សាយរបស់បណ្តាញទូរទស្សន៍ចិន CCTV ។ 

ស្តេចល្បែងដ៏ឆ្នើម ដែលចូលចិត្តរាំ តែបានណែនាំឱ្យអ្នកដែលនៅជិតស្និទ្ធបំផុតរបស់ខ្លួន និងមនុស្សជាទីស្រឡាញ់ឱ្យចៀសឆ្ងាយពីល្បែងស៊ីសងនោះ បានបង្កើតអាជីវកម្មល្បែង​ភ្នាល់ ដែលរកប្រាក់ចំណេញច្រើនបំផុត នៅលើពិភពលោក តាមរយៈក្រុមហ៊ុនរបស់គាត់ គឺក្រុមហ៊ុន SJM Holdings Ltd ដែលមានតម្លៃប្រហែល ៦ពាន់លានដុល្លារ​អាមេរិក ។

ភាគហ៊ុន​របស់ក្រុមហ៊ុនទាំងឡាយ ​នៅក្នុងអាណាចក្រគ្រួសារ​ស្តេចល្បែង​នេះ ​បានកើនឡើង​​ បន្ទាប់ពីព័ត៌មាន​ ស្តីអំពី​មរណភាព​នេះ​បាន​កើតឡើង ។ ក្រុមហ៊ុន SJM Holdings Ltd ភាគហ៊ុនបានកើនឡើង​ ៨,៥ ភាគរយ ខណៈ​ភាគហ៊ុន​ក្រុមហ៊ុនដឹកជញ្ជូន Shun Tak Holdings Ltd កើនឡើង ​១៧,៦ ភាគរយ ហើយប្រតិបត្តិករ កាស៊ីណូ Melco បានកើនឡើង ៤,៩ ភាគរយ គឺកើនឡើង ២ ភាគរយពីសន្ទស្សន៍គោល ។

ចាប់កំណើត ​នៅទីក្រុងហុងកុង ស្តេចល្បែង Stanley Ho មានប្រពន្ធ​៤នាក់ និង​កូន១៧នាក់ (តាមដែលបានដឹង) ។ ប្រព័ន្ធកូនច្រើន​ បូករួមទាំងមានទ្រព្យសម្បត្តិស្តុកស្តម្ភផងនោះ បាននាំឲ្យមានជម្លោះ​នៅក្នុងក្រុមគ្រួសារ​ផ្ទុះឡើង កាលពីឆ្នាំ​២០១២រៀង​មក ​ពាក់ព័ន្ធនឹងការបែងចែក​កេរមរតក។  

ក្រុមអ្នកវិភាគមិនរំពឹងថា មរណភាពរបស់ស្តេចល្បែង Stanley Ho មិនជះឥទ្ធិពលយ៉ាងខ្លាំងដល់ប្រតិបត្តិការប្រចាំថ្ងៃនោះទេ ។

ក្រុមហ៊ុនដែលកាន់កាប់ដោយឯកជនរបស់គាត់ គឺក្រុមហ៊ុន Sociedade de Turismoe Diversões de Macau ឬ STDM នោះ មានភាគហ៊ុនទាំងអស់ តាំងពីសណ្ឋាគារប្រណីត រហូតដល់ឧទ្ធម្ភាគចក្រ និងការប្រណាំងសេះជាដើម ។

ស្តេចល្បែង Stanley Ho បានដឹកនាំអ្វីដែលគេស្គាល់នៅម៉ាកាវថា ជាប្រព័ន្ធ​ វីអាយភី ឥតមានតម្រូវការឈ្មួញកណ្តាលដើរតួ ក្នុងនាមកាស៊ីណូ ដោយបន្តផ្តល់ឥណទានដល់អ្នកលេងល្បែង និងទទួល​ខុសត្រូវ នៅក្នុងការប្រមូលបំណុល ។

កូនៗមួយចំនួនរបស់លោក Stanley Ho បានក្លាយជាអ្នកលេងល្បែង ដែលទទួលបានជោគជ័យ ។ កូនស្រីរបស់គាត់ ឈ្មោះ Pansy គឺជាសហប្រធានក្រុមហ៊ុន MGM Resorts’ Macau ។ រីឯកូនប្រុសឈ្មោះ Lawrence ជាម្ចាស់ដំណើរការសណ្ឋាគារ Melco និងកម្សាន្តដ៏ល្បីល្បាញផងដែរ៕ ប្រែសម្រួលដោយ៖ thach yat

from： https://tnaot.com/km/m/detail/article/9260694