បណ្តាញទូរទស្សន៍អ៊ីរ៉ង់ ​ILNA ​បានដកស្រង់សម្ដីរដ្ឋលេខាធិការក្រសួងសុខាភិបាលអ៊ីរ៉ង់ លោក Qassem Janbabai​ បានបញ្ជាក់ថា បុគ្គលិកសុខាភិបាល​អ៊ីរ៉ង់ មានរហូតដល់​ជាង​១ម៉ឺននាក់ បានឆ្លងកូវីដ​១៩ ហើយក្នុងចំណោមបុគ្គលិកទាំងនោះ ក៏មានពេទ្យជាច្រើននាក់បានស្លាប់ ដោយសារកូវីដ១៩ផងដែរ។

អ៊ីរ៉ង់ ជាសម្បុកកូវីដ​១៩​ដ៏ធំបំផុត នៅក្នុងតំបន់មជ្ឈិមបូព៌ា ដោយមានអ្នកឆ្លងកើនឡើង រហូតដល់ទៅជាង​១២៩ពាន់នាក់ ក្នុងនោះមានអ្នកស្លាប់ កើនឡើងជាង ៧២០០នាក់ ។ កាលពីខែមេសា ក្រសួងសុខាភិបាល បានប្រកាសថា មានបុគ្គលិកសុខាភិបាល រហូតដល់ទៅ​១០០នាក់បានស្លាប់ ដោយសារកូវីដ១៩​។

បើតាមការផ្សាយរបស់​ ILNA ​ រដ្ឋមន្ត្រីក្រសួងសុខាភិបាល​​អ៊ីរ៉ង់ លោក​ Saeed Namaki បានអំពាវនាវដល់ពលរដ្ឋ កុំឲ្យធ្វើដំណើរកម្សាន្ត ឬចូលរួម នៅក្នុងពិធីបុណ្យ Eid al-Fitr នាចុងខែឧសភានេះ​​ ដើម្បី​បញ្ចៀសការឆ្លងកូវីដ​១៩​ កាន់តែច្រើន​។ ពលរដ្ឋ​អ៊ីរ៉ង់​តែងតែធ្វើដំណើរកម្សាន្ត នៅតំបន់ផ្សេងៗ ក្នុងប្រទេស ក្រោយពេលពិធីបុណ្យ​ Ramadan ​របស់សាសនិកអ៊ិស្លាប់ រយៈពេល​១ខែ បានបញ្ចប់ ។

លោក​ Saeed Namaki បានបញ្ជាក់ថា​ «ខ្ញុំសូមអំពាវនាវដល់ពលរដ្ឋទាំងអស់កុំទៅដើរកម្សាន្ដ ក្នុងអំឡុងពេលនេះ ដើម្បីធានា​សុវត្ថិភាពដល់ខ្លួនឯងផ្ទាល់ មិនឆ្លងកូវីដ១៩ និងក្រុមគ្រួសាររបស់យើង​។ ប្រសិនបើ មានករណីឆ្លងផ្ទុះឡើងខ្លាំង ​នឹងពិបាកគ្រប់គ្រង ហើយអាចបណ្តាលឲ្យមានអ្នកស្លាប់កាន់តែច្រើន»ឡើងថែមទៀត។

បើតាមរបាយការណ៍​របស់មជ្ឈមណ្ឌលស្រាវជ្រាវរបស់សភាអ៊ីរ៉ង់ ​បានបញ្ជាក់ថា ចំនួនអ្នកឆ្លកូវីដ​១៩ នៅអ៊ីរ៉ង់ និងអ្នកស្លាប់ អាចច្រើនជាងទ្វេដង ពីតួលេខរបស់ក្រសួងសុខាភិបាល បានប្រកាស៕ ប្រែសម្រួល​ដោយ៖MEO

from： https://tnaot.com/km/m/detail/article/9242157