Sign In 
កណ្តាល៖ មានករណីអគ្គីភ័យមួយបណ្តាលឲ្យឆេះផ្ទះប្រជាពលរដ្ឋអស់មួយមាន ៣ខ្នងធ្វើអំពីឈើខាងលើ ខាងក្រោមថ្ម ឆេះអស់ទាំងស្រុង និងរាលដាលឆេះផ្ទះជាប់គ្នា ២ ខ្នងបន្ថែមទៀតប៉ុន្តែកម្លាំងអន្តរាគមន៍យើងបានពន្លត់ទាន់គ្រាន់តែឆេះរោលជញ្ជាំងបន្តិចបន្តួច។
ហេតុការណ៍នេះ កើតឡើងនៅថ្ងៃទី២១ ខែឧសភា ឆ្នាំ២០២០ វេលាម៉ោង ៨ និង ៣០នាទីព្រឹកនៅនៅភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្ដាល។
ជនរងគ្រោះជាម្ចាស់ផ្ទះមាន ឈ្មោះ សឹម សន ភេទប្រុស អាយុ ៥៦ឆ្នាំ និងប្រពន្ធឈ្មោះ រី សារឹម អាយុ ៥៥ឆ្នាំ មានទីលំនៅ ភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល មុខរបរកសិករ។ ហើយបើតាមការអះអាងពីលោកវរសេនីយ៍ឯក ហេង សុផល អធិការនគរបាលស្រុកល្វាឯម ផ្ទះដែលឆេះមានទទឹង ៧ម៉ែត្រ បណ្តោយ ១៨ម៉ែត្រ ប្រក់ក្បឿង ខូចខាតទាំងស្រុង និងឆេះអស់ទ្រព្យសម្បត្តិមួយចំនួនទៀត ដូចជាប្រាក់ ៥០០០ដុល្លារ និង ៨លានរៀលមាស ៥ដំឡឹង ម៉ូតូម៉ាក់សង់ ០២គ្រឿង និងឯកសារផ្ទាល់ខ្លួន សម្ភារៈមួយចំនួនទៀត។
មូលហេតុដែលនាំឲ្យឆេះ ដោយសារឆ្លងចរន្តអគ្គិសនី នៅជាន់ខាងលើផ្ទះ បណ្ដាលឲ្យឆេះមុន ខណៈនគរបាលជំនាញស្រុក ជួយអន្តរាគមន៍ពន្លត់រលត់ដោយជោគជ័យដោយប្រើប្រាស់រថយន្តពន្លត់អគ្គីភ័យ ២គ្រឿង អស់ទឹក ៨ឡាន រហូតដល់ម៉ោង ៩និង ៤៥នាទី ទើបរលត់ទាំងស្រុង៕
ដោយ៖ ផេង ភាព
