ការឆ្លងរាតត្បាត នៃវីរុសកូរ៉ូណា ឬកូវីដ១៩ បានធ្វើឲ្យប៉ះពាល់យ៉ាងខ្លាំងដល់ប្រាក់ចំណូលលើវិស័យអាកាសចរណ៍ ហើយចុងក្រោយ ក្រុមហ៊ុនអាកាសចរណ៍​ Lion Air Group បានសម្រេចចិត្ដកាត់បន្ថយប្រាក់ខែ និងប្រាក់លើកទឹកចិត្ដ Idul Fitri (THR) ដល់បុគ្គលិក។ ប៉ុន្ដែទោះជាយ៉ាងណា ក្រុមហ៊ុនមិនបានបញ្ឈប់ការងារពីបុគ្គលិកនោះឡើយ។

ក្រុមហ៊ុនអាកាសចរណ៍ Lion Air Group បានថ្លែង កាលពីថ្ងៃទី២០ ខែឧសភា​ ថា បុគ្គលិករបស់ក្រុមហ៊ុន ចំនួន២៩ ០០០នាក់ ត្រូវបានកាត់បន្ថយប្រាក់ខែ ចាប់តាំងពីខែមីនា ឆ្នាំ២០២០។ ក្រុមហ៊ុននៅតែអនុវត្ដដូច្នោះ ដើម្បីធ្វើឲ្យការចំណាយកាន់តែតិច សម្រាប់ទ្រទ្រង់សេដ្ឋកិច្ចរបស់ក្រុមហ៊ុន នៅក្នុងស្ថានភាព នៃកូវីដ១៩នេះ។

ក្រុមហ៊ុនអាកាសចរណ៍ Lion Air Group មានសាខាជាច្រើន រួមមាន​ Lion Air, Wings Air និង Batik Air បានកំណត់ជើងហោះហើរ ចាប់តាំងពីថ្ងៃទី១០ ខែឧសភា ឆ្នាំ២០២០ បន្ទាប់ពីមានបម្រាមលើការហោះហើរ អស់រយ:ពេល២សប្ដាហ៍ ដើម្បីទប់ស្កាត់នូវការឆ្លងរីករាលដាល នៃវីរុសកូរ៉ូណា ឬកូវីដ១៩។

លោក ដាណាង ម៉ែនដាឡា ព្រីហាន់តូរ៉ូ  (Danang Mandala Prihantoro) អ្នកនាំពាក្យក្រុមហ៊ុនអាកាសចរណ៍ Lion Air Group បានសរសេរ នៅក្នុងសេចក្ដីថ្លែងការណ៍មួយថា ស្ថានភាពបែបនេះ បានជំរុញឲ្យក្រុមហ៊ុនរៀបចំជាជំហានៗ ដើម្បីបន្ដនិរន្ដរភាពលើវិស័យអាកាសចរណ៍នេះ។ រីឯប្រតិបត្ដិការរបស់ក្រុមហ៊ុន មានតែ៥ភាគ នៃជើងហោះហើរជាធម្មតា ចំនួន១០០០ជើង ក្នុងមួយថ្ងៃ។

ស្ថិតក្នុងស្ថានភាពបែបនេះ ក្រុមហ៊ុនបានពន្យារលើការបើកប្រាក់លើកទឹកចិត្ត (THR) នៅក្នុងខែឧសភា សម្រាប់បុគ្គលិក​មានប្រាក់ខែខ្ពស់ និងមធ្យម។ ប្រភេទបុគ្គលិកទាំងនោះ រួមមាន ផ្នែកមេកានិក អាកាយានិក និងអ្នកគ្រប់គ្រង៕ ប្រែសម្រួលដោយ Nuon

from： https://tnaot.com/km/m/detail/article/9237523