ការបង្រៀនតាមប្រព័ន្ធអនឡាញក្រៅសាលា ឬហៅថាការសិក្សាពីចម្ងាយ ដែលជាកម្មវិធីសិក្សាថ្មី របស់ក្រសួងអប់រំ យុវជននិងកីឡា អាចនៅមិនទាន់ឈានទៅរកភាពជោគជ័យឡើយ។ របត់ថ្មីនៃការរៀនតាមប្រព័ន្ធអនឡាញនេះ វាមិនមែនជារឿងថ្មីសម្រាប់ប្រទេស ដែល​មាន​ការអភិវឌ្ឍ​ស្រាប់ហើយនោះទេ ប៉ុន្តែសម្រាប់កម្ពុជា វាបានជ្រាបចូលមកយ៉ាង​​​លឿន នៅក្នុងអំឡុងពេល កើត​មាន​វិបត្តិកូវីដ១៩ នៅទូទាំងសកលលោក​។

បើតាមប្រធានសហព័ន្ធសេវាអប់រំនៅកម្ពុជា លោកប៉ិច បូឡែន អគ្គនាយក Westline Education Group បានប្រាប់​ឱ្យដឹងថា នៅពេលដែលប្រទេសកម្ពុជា មានការជំរុញឱ្យមានកម្មវិធីសិក្សា តាម​ប្រព័ន្ធ​អនឡាញ គឹទាមទារឱ្យគ្រូបង្រៀន អាណាព្យាបាល រួមទាំងសិស្ស ត្រូវបង្កើនកិច្ចសហការគ្នា ឱ្យបានយ៉ាង​ខ្លាំង​ថែមទៀត។

ភាគច្រើនសិស្សដែលរៀននៅតាមផ្ទះ គឺគ្មានភាពងាយស្រួលនៅក្នុងការសិក្សានោះទេ រីឯការបង្រៀន​របស់គ្រូ ក៏កាន់តែលំបាកជាងមុន ហើយអាណាព្យាបាល ក៏ប្រឈមនឹងបញ្ហាធ្វើការច្រើនថែមទៀត និងត្រូវងាក​មក​បង្រៀនកូនច្រើនម៉ោងផងដែរ។

លោកបញ្ជាក់ថា បញ្ហាលំបាករបស់គ្រូ គឺតម្រូវឱ្យគាត់រៀនពីបច្ចេកវិទ្យាអប់រំតាមអនឡាញភ្លាមៗ ដូចជាការសន្ទនាតាមវីដេអូ Conference ឬក៏របៀបបង្រៀន និងការរៀន​ថតទុក​ជា​ដើម។ គ្រូខ្លះអាចបង្រៀនទៅបាន ប៉ុន្តែបែរជាមិនសូវមានភាពក្លាហ៊ាន​ចូលក្នុងការប្រឈមនឹងម៉ាស៊ីនថត ទោះយ៉ាងណា បញ្ហានេះអាចជម្នះបាន។  

ជាមួយគ្នានេះ ផលលំបាកសម្រាប់អាណាព្យាបាល គឺពួកគេអត់ចេះប្រើប្រាស់បច្ចេកវិទ្យានេះដូចគ្នា អាណាព្យាបាលខ្លះ មិនចេះសូម្បីតែហៅឈ្មោះកម្មវិធីZoom ទម្រាំតែការដំឡើងកម្មវិធីផ្សេងៗទៀត ដូចជា google meet…ឬតេឡេក្រាមក៏ពិបាកដែរ។ នេះបើតាមប្រធានសហព័ន្ធសេវាអប់រំនៅកម្ពុជា លោកប៉ិច បូឡែន។

ដោយមើលឃើញពីផលលំបាកនេះ ​ អគ្គនាយក Westline Education Group ​បានធ្វើការ​ជំរុញ​ឱ្យ​គ្រូ​បង្រៀន ត្រូវបង្កើនកិច្ចសហការបន្តជាមួយនឹងអាណាព្យាបាលសិស្ស។ មិនត្រឹមតែប៉ុណ្ណោះ គឺពង្រឹងទៅលើគុណភាពអប់រំរបស់គ្រូ ព្រមទាំងដាក់កាលវិភាគកម្មវិធីបង្រៀនរបស់គ្រូ ឱ្យច្រើនជាងមុន ដើម្បីឆ្លើយតបទៅដល់ការរៀនរបស់សិស្ស ឱ្យបានរលូនជាងមុន។

ជាមួយគ្នានេះ បើតាមលោកគឹម អឿន ប្រធានក្រុមហ៊ុនHome Education​និងជាអាណាព្យាបាល​ម្នាក់បានទទួលស្គាល់ថា លោកនិងអាណាព្យាបាលផ្សេងទៀត ពិតជាត្រូវប្រើពេលវេលាច្រើន ដើម្បី​​ជួយបង្ហាត់បង្រៀនកូននៅផ្ទះ ខណៈពួកគេត្រូវចូលរៀន តាមអនឡាញជាមួយគ្រូម្តងៗ។

លោកបញ្ជាក់ថា”ការបង្រៀនតាមអនឡាញ គឺត្រូវទាមទារឱ្យគ្រូ មានការប្រុងប្រយ័ត្នច្រើនជាងមុន ទាក់ទងនឹងគុណភាពនៃការបង្រៀន និងផ្តោតលើបញ្ហាអ៊ីនធើណេតផងដែរ”។ 

ការរៀនតាមអនឡាញ វាពិតជាបានធ្វើឱ្យកុមារមានភាពវៃឆ្លាត​ រហ័សរហួន និងពូកែក៏ពិតមែន ប៉ុន្តែអាណាព្យាបាលក៏គួរតែមានការព្រួយបារម្ភ ទៅលើផលប៉ះពាល់មួយចំនួន នៃការប្រើប្រាស់បច្ចេកវិទ្យាយានេះដែរ។

លោកគឹម អឿនបានបញ្ជាក់ថា” ការបង្រៀនកុមារដែលពាក់ព័ន្ធនឹងបច្ចេកវិទ្យា វាអាចធ្វើឱ្យពួកគេ មានផលប៉ះពាល់ដល់សុខភាពភ្នែក អារម្មណ៍មួរម៉ៅ នៅពេលដែលធ្វើអ្វីមិនបាន នឹងអាចឈានទៅដល់ការឆែកចូលមើលវេបសាយណា ដែលត្រូវបានហាមឃាត់ជាដើម”។

ស្រដៀងគ្នាផងដែរ យុវតី យ៉ង វិច្ឆិកា ដែលកំពុងសិក្សានៅសាលាឯកជនមួយ បានប្រាប់ឱ្យដឹងដែរថា សាលាបានប្រើប្រាស់កម្មវិធី Zoom ដើម្បីទំនាក់ទំនងនៅក្នុងការរៀននៅផ្ទះ​ តាមអនឡាញ។

យុវតីវិច្ឆិកាបានបញ្ជាក់ថា ការរៀនតាមអនឡាញមួយរយៈនេះ បានធ្វើឱ្យគាត់ធ្លាក់​ចុះនូវគុណ​ភាព​សិក្សា។

យុវតីវិច្ឆិកាថា ”ការរៀនតាមអនឡាញ គឺពិតជាពិបាកនៅក្នុងចាប់យកមេរៀន ព្រោះមេរៀនខ្លះ ខ្ញុំអត់​សូវ​យល់ ហើយឱកាសនៃការសួរគ្រូក៏មានតិច” ។

ទោះបីជាយ៉ាងនេះក្តី វិច្ឆិកា នៅតែខិតខំព្យាយាមរៀនសូត្រ តាមប្រព័ន្ធបច្ចេកវិទ្យានេះ ដើម្បីតាមឱ្យទាន់មេរៀនរបស់សាលាផងដែរ។

ជុំវិញរឿងនេះ កាលពីថ្ងៃទី១៧ ខែមេសា ឆ្នាំ២០២០ ក្រសួងអប់រំបានចេញសេចក្តីជូនដំណឹងមួយ ស្តីពីការពន្យារពេលនៃការចូលរៀនឡើងវិញ សម្រាប់គ្រឹះស្ថានសិក្សាគ្រប់កម្រិត គ្រប់ប្រភេទ ទាំង​សា​ធារ​ណៈនិងឯកជន និងគ្រឹះស្ថានបណ្តុះបណ្តាលគ្រូ នៅទូទាំងប្រទេស។

សូមបញ្ជាក់ដែរថា នៅក្នុងចំណុចទី៤ នៃសេចក្តីប្រកាសនេះ បានផ្តោតយ៉ាងសំខាន់ ទៅលើការ​ពន្យារ​ពេល​នៃការចូលរៀនឡើងវិញ រហូតដល់មានការជូនដំណឹងជាថ្មី និងបន្តអនុវត្តវិធានការ ការសិក្សាពី​ចម្ងាយ និងការសិក្សាតាមប្រព័ន្ធ អេឡិចត្រូនិកជាដើម៕ ដោយ៖ ឃួន លក្ខិណា

from： https://tnaot.com/km/m/detail/article/9234591