កងទ័ពរបស់រដ្ឋាភិបាលលីប៊ី ដែលទទួលស្គាល់ដោយអង្គការសហប្រជាជាតិ បានវាយដណ្ដើមគ្រប់គ្រងឡើងវិញ ទីក្រុងចំនួន២ នៅជិតព្រំដែន នៃប្រទេសទុយនេស៊ី បន្ទាប់ពីវាយដណ្ដើម​កាន់កាប់បានមូលដ្ឋាន​ទ័ព​អាកាសយុទ្ធសាស្រ្ដ al-Watiya កាលពីថ្ងៃទី១៨ ខែឧសភា កន្លងទៅថ្មីៗនេះ។

កងទ័ពសម្ពន្ធមិត្តរួមជាមួយនឹងរដ្ឋាភិបាល នៃកិច្ចព្រមព្រៀងជាតិ (GNA) របស់ប្រទេសលីប៊ី ដែលទទួលស្គាល់ជាលក្ខណ:អន្ដរជាតិ ដឹកនាំដោយលោក Fayez al-Sarraj បានថ្លែងថា GNA និងសម្ពន្ធមិត្ត​បានវាយដណ្ដើមគ្រប់គ្រងឡើងវិញ នៅទីក្រុងចំនួន២ ពីកងកម្លាំងរបស់មេបញ្ជាការយោធា លោក  Khalifa Haftar ដែលគាំទ្រដោយរុស្ស៊ី។

GNA បានថ្លែងសារនៅលើបណ្ដាញសង្គមហ្វេសប៊ុក កាលពីថ្ងៃទី១៩ ខែឧសភា ថា កងកម្លាំងវីរជនរបស់យើង ​បានចូលកាន់កាប់ទីក្រុង Bader និងទីក្រុង Tiji ។ នៅពេលកងទ័ពរបស់យើងចូលទៅដល់ទីនោះ ក៏ទទួលបានការស្វាគមន៍ ពីអ្នកស្រុកផងដែរ។

កងកម្លាំងសម្ពន្ធមិត្ដរបស់ GNA កាលពីដើមសប្ដាហ៍នេះ បានវាយដណ្ដើមកាន់កាប់ឡើងវិញ នៅមូលដ្ឋានកងទ័ពអាកាសយុទ្ធសាស្រ្ដ នៅភាគខាងត្បូង នៃរដ្ឋធានីទ្រីប៉ូលី។ មូលដ្ឋានទ័ពអាកាសនេះ​ បានធ្លាក់ទៅក្រោមការគ្រប់គ្រងរបស់លោកមេបញ្ជាការយោធា Haftar ចាប់តាំងពីឆ្នាំ២០១៤ មកម៉្លេះ។

អ្នកវិភាគ បានលើកឡើងថា ការបាត់បង់មូលដ្ឋានកងទ័ពអាកាស ដែលជាមូលដ្ឋានដ៏សំខាន់របស់កងកម្លាំងរបស់លោក  Haftar នៅភាគ​បច្ចិម (ខាងលិច) នៃប្រទេសលីប៊ីនោះក៏ជាសញ្ញាដ៏អាក្រក់មួយសម្រាប់លោក Haftar ដែលព្យាយាមដណ្ដើមកាន់រដ្ឋធានីទ្រីប៉ូលី ពីកងកម្លាំង GNA ផងដែរ។

ក្រោយបាត់បង់ការគ្រប់គ្រងមូលដ្ឋានកងទ័ពអាកាសខាងលើ លោក Ahmed al-Mesmari អ្នកនាំពាក្យរបស់កងទ័ពជាតិលីប៊ី (LNA) របស់លោក Haftar បានថ្លែង កាលពីថ្ងៃទី១៩ ខែឧសភាថា កងកម្លាំងដែលមានមូលដ្ឋាន នៅភាគខាងកើត នៃប្រទេសលីប៊ី ត្រូវបានដកចេញពីតំបន់ ប្រយុទ្ធគ្នា នៃរដ្ឋធានីលីប៊ី។

លោក Fathi Bashagha រដ្ឋមន្រ្ដីក្រសួងមហាផ្ទៃ នៃ GNA បានសរសេរ នៅលើបណ្ដាញ Twitter ថា ជោគវាសនា នៃជ័យជម្នះ​របស់មេបញ្ជាការយោធា លោក Haftar គឺស្ថិតក្នុងចំណុចសូន្យ មិនខុសពីអ្វី នៃការបាត់បង់មូលដ្ឋាន Watiya អ៊ីចឹងដែរ។

រដ្ឋាភិបាល​ GNA បានទទួលស្គាល់ ដោយអង្គការសហប្រជាជាតិ ហើយ GNA ក៏មានការជួយផ្នែកយោធាពីប្រទេសតួកគី។ ដោយឡែក LNA ក្រោមការគ្រប់គ្រង ដោយលោក Haftar ក៏មានការជួយជ្រោមជ្រែងពីប្រទេសអារ៉ាប់រួម (UAE) រុស្ស៊ី និងអេហ្ស៊ីបផងដែរ។

ប្រទេសលីប៊ី ​បានធ្លាក់ចូលក្នុងស្ថានភាពវឹកវរ ចាប់តាំងពីការផ្ទុះឡើងសង្រ្គាមស៊ីវិល ហើយអង្គការណាតូ​បានចូលរួមផ្ដួលរំលំរបបគ្រប់គ្រងផ្ដាច់ការរបស់លោក Muammar Gaddafi នៅក្នុងអំឡុងឆ្នាំ២០១១។ ក្រោយមក ក៏កើតមានកងកម្លាំង GNA និង LNA តែងតែវាយប្រហារគ្នាយ៉ាងបង្ហូរឈាម រហូតមកដល់សព្វថ្ងៃនេះ៕ ប្រែសម្រួល ដោយ Nuon

from： https://tnaot.com/km/m/detail/article/9234395