អតីតខ្សែប្រយុទ្ធក្រុមជម្រើសជាតិប្រេស៊ីល លោក Giovane Elber យល់ថាក្លិប Barcelona មិនគួរចុះហត្ថលេខាយក Neymar មកពីក្លិប Paris Saint-Germain វិញទេ ដោយសារការដែលលេងនៅទីនេះរូបគេគិតថាមិនអាចនាំឱ្យខ្លួនក្លាយទៅជាកីឡាករល្អបំផុតនៅលើពិភពលោកទេ។

ខ្សែបម្រើប្រយុទ្ធ Neymar វ័យ ២៨ ឆ្នាំត្រូវបានគេផ្សាភ្ជាប់ជាមួយនឹងការវិលត្រឡប់ទៅកាន់ក្លិប Barca វិញអស់រយៈពេលជាង ៣ ឆ្នាំមកហើយ បន្ទាប់ពីផ្លាស់ទៅចូលរួមជាមួយ PSG ក្នុងតម្លៃខ្លួនកប់ពពក ២២២ ​​លានផោន។

លោក Elber បានប្រាប់វិទ្យុអេស្ប៉ាញ Cadena SER ថា៖ “នៅពេល Neymar ចាកចេញពី Barca សម្រាប់ខ្ញុំលទ្ធភាពដែលគាត់អាចត្រឡប់មកវិញគឺគ្មានទេ។ ខ្ញុំបានដឹងពីបំណងរបស់ Neymar ដែលគាត់សម្រេចចិត្តចាកចេញ ព្រោះគាត់ចង់ក្លាយជាកីឡាករល្អបំផុតលើពិភពលោក។ ប៉ុន្តែវាមិនអាចទៅរួចទេដែលគាត់ចង់ក្លាយទៅជាកីឡាករល្អជាងគេដោយសម្រេចទៅចូលរួមជាមួយ PSG នោះ។ គាត់គួរណាតែទៅចូលរួមជាមួយ Barca ឬក៏ Real Madrid ដើម្បីឈ្នះពានរង្វាន់ Champions League ទើបជាការប្រសើរ”។

លោកបានបន្តទៀតថា៖ “ខ្ញុំជឿជាក់ថា PSG នឹងនៅតែមិនអាចឈ្នះពានរង្វាន់ Champions League ក្នុងរយៈពេល ៣ ឬ ៤ ឆ្នាំខាងមុខទៀតឡើយ”។

ចាប់តាំងពីផ្លាស់ទៅចូលរួមជាមួយ PSG ខ្សែបម្រើប្រយុទ្ធ Neymar បានជួយឱ្យក្លិបឈ្នះពានរង្វាន់លីគកំពូលរបស់បារាំង Ligue 1 ចំនួន ៣ លើកក្នុងចំណោមពានរង្វាន់ក្នុងស្រុកជាច្រើនទៀត ខណៈពេលដែលរូបគេនៅមិនទាន់ជួយឱ្យក្លិបឈ្នះពានរង្វាន់ Champions League នៅឡើយទេ៕

កែសម្រួលដោយ៖ ភារ៉ា

ប្រភព៖ sportstar

from： https://tnaot.com/km/m/detail/article/9226437