Sign In 
ភ្នំពេញ៖ យុវជនម្នាក់រងរបួសបែកក្បាលហូរឈាមជោគជាំពេញខ្លួន ខណៈបើករម៉កសណ្តោងម៉ូតូក្រឡាប់។ ហេតុការណ៏គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង ១៖១៥នាទីរសៀលថ្ងៃទី៨ ខែឧសភា ឆ្នាំ២០២០ ស្ថិតនៅខាងក្រោមស្ពានអាកាសស្ទឹងមានជ័យផ្លូវក្រោមដី សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជនរងគ្រោះខាងលើបើកម៉ូតូសណ្តោងរម៉កមួយគ្រឿងគ្មានស្លាកលេខ ធ្វើដំណើរពីលើស្ពានអាកាសស្ទឹងមានជ័យ ចុះចំណោតផ្លូវក្រោមដីក្នុងល្បឿនយ៉ាងលឿនលុះដល់ចំណុចផ្លូវកោងបណ្តាលឲ្យក្រឡាប់បោកក្បាលផ្ទប់ជាមួយឃឿនថ្មរងរបួសយ៉ាងធ្ងន់ធ្ងរ។ ក្រោយរងបួស យុវជនខាងលើត្រូវបានបញ្ជូនតាមរថយន្តសាមុយទៅកាន់មន្ទីរពេទ្យ ដើម្បីធ្វើការសង្រ្គោះ។
ក្រោយពេលកើតហេតុសមត្ថកិច្ចមូលដ្ឋាន បានចុះមកកន្លែងកើត និងយករម៉កម៉ូតូរបស់ជនរងគ្រោះទៅរក្សាទុកនៅប៉ុស្តិ៍នគរបាលរដ្ឋសង្កាត់ស្ទឹងមានជ័យទី១ ដើម្បីទុកប្រគល់ជូនម្ចាស់វិញ៕ ដោយ៖ សួង សាម
