Sign In 
សិស្សសាលា នៅក្នុងទីក្រុងវូហាន កាលពីថ្ងៃទី៦ ខែឧសភា ឆ្នាំ២០២០ បានវិលត្រឡប់ចូលរៀន ជាលើកដំបូងវិញហើយ បន្ទាប់ពីផ្អាកអស់រយៈពេលជាច្រើនខែមក។ 
ទីក្រុងវូហាន ខេត្តហ៊ូប៉ី ភាគកណ្តាល នៃប្រទេសចិន ជាទីកន្លែងដែលផ្ទុះឡើងដំបូងគេ នៃកូរ៉ូណាវីរុសប្រភេទថ្មី ឬកូវីដ-១៩ (COVID-19) កាលពីចុងខែធ្នូ ឆ្នាំ២០១៩ ហើយត្រូវបានប្រកាសឲ្យផ្អាកការសិក្សាជាបណ្តោះអាសន្ន នៅខែមករា ឆ្នាំ២០២០ ដើម្បីទប់ស្កាត់ការឆ្លងរាតត្បាតនៃមេរោគនេះ។
វីរុសនេះបានឆ្លងទៅលើពលរដ្ឋ នៅក្នុងប្រទេសចិន សរុប ៨២ ៨៨៣ នាក់ ក្នុងនោះបាត់បង់ជីវិត ៤ ៦៣៣ នាក់ និង ៧៧ ៩១១ នាក់បានជាសះស្បើយ។ នេះបើ គិតមកត្រឹមថ្ងៃទី៦ ខែឧសភា ឆ្នាំ២០២០ ។ 
វីរុសនេះបានឆ្លងនៅលើដែនដី និងប្រទេសសរុប ២២៧ ជុំវិញពិភពលោក, ឆ្លងលើមនុស្សសរុបជាង ៣,៦ លាននាក់ និងបាត់បង់ជីវិតជាង ២៥៧ ២០៧ នាក់។ សហរដ្ឋអាមេរិកជាប្រទេសកំពុងរងគ្រោះធ្ងន់ ជាងគេបំផុត ។
នៅក្នុងប្រទេសចិន ហាក់បានគ្រប់គ្រងការឆ្លងរាតត្បាតនេះ ស្ទើរទាំងស្រុងហើយ ទើបសេដ្ឋកិច្ច និងពាណិជ្ជកម្មមួយចំនួន ត្រូវបានបើកទ្វារឲ្យដំណើរការឡើងវិញ ។
ជាមួយគ្នានេះផងដែរ គ្រឹះស្ថានអប់រំក៏បានចាប់ផ្តើមបើកទ្វារឲ្យដល់សិស្ស និងនិស្សិតសម្រាប់បន្តការសិក្សារបស់ខ្លួនឡើងវិញ ។ 
ប្រភព CNA នៅថ្ងៃទី៦ ខែឧសភា ផ្សាយថា គ្រឹះស្ថានអប់រំចំនួន១២១ នៅក្នុងទីក្រុងវូហាន បានអនុញ្ញាតឲ្យនិស្សិតចូលទៅបន្តការសិក្សាឡើងវិញ ដោយឆ្លងកាត់ម៉ាស៊ីនស្កែនកម្តៅរកវីរុសជាមុនសិន ។
នៅលើបណ្តាញទំនាក់ទំនង Weibo និស្សិតម្នាក់បញ្ជាក់ថា «ទីបំផុតសាលារៀនបើកដំណើរការឡើងវិញហើយ ។ នេះជាលើកទីមួយ ខ្ញុំសប្បាយចិត្តណាស់ បានវិលត្រឡប់មកសិក្សាវិញ បើទោះជាត្រូវប្រឡងប្រចាំខែ នៅថ្ងៃទី៨ ខែឧសភា នេះយ៉ាងណាក៏ដោយ» ។ 
គួរបញ្ជាក់ថា សាលារៀនដែលបើកទ្វារឡើងវិញនៅទីក្រុងវូហាននេះ សម្រាប់តែសិស្សថ្នាក់ខ្ពស់ប្រឡងចូលសាកលវិទ្យាល័យ ឬបាក់ឌុបប៉ុណ្ណោះ។ ដោយឡែកសិស្សថ្នាក់ទាប និងថ្នាក់មធ្យម គឺនៅមិនទាន់ ត្រូវបានអនុញ្ញាតឲ្យចូលរៀននៅឡើយទេ៕ ប្រែសម្រួលដោយ៖ thach yat
