Sign In 
ទីភ្នាក់ងារការពារបរិស្ថាន EPA បានច្រានចោលការលើកឡើងរបស់លោក Elon Musk នាយកប្រតិបត្តិ Tesla ដែលថាទីភ្នាក់ងារនេះបានសាងកំហុសឆ្គងពេលធ្វើតេស្តជាមួយរថយន្ត Model S ដែលធ្វើឲ្យរយៈចម្ងាយបើកបររបស់រថយន្តមានទាបជាងអ្វីដែលលោក Elon គិតទុក។
អំឡុងពេលប្រកាសអំពីលទ្ធផលចំណូលចំណាយប្រចាំត្រីមាសកាលពីសប្ដាហ៍មុន លោក Elon Musk អះអាងថា Tesla Model S Long Range អាចជារថយន្តអគ្គិសនីដំបូងអាចជិះបានចម្ងាយ ៤០០ម៉ាយ (ប្រមាណ ៦៤៣ គីឡូម៉ែត្រ) ហើយលទ្ធផលនៃការធ្វើតេស្តរបស់ EPA ដែលមានត្រឹម ៣៩១ ម៉ាយ (ប្រមាណ ៦២៩ គីឡូម៉ែត្រ) គឺដោយសារកំហុសឆ្គង។ លោក Elon និយាយថា មានអ្នកទុកសោចោលក្នុងរថយន្ត និងបើកទ្វារចោលពេញមួយយប់ ធ្វើឲ្យរថយន្ត Model S ដំណើរការមុខងារ “Waiting for Driver” ដែលធ្វើឲ្យអាគុយខាតបង់ថាមពល ២%។ នេះជាលទ្ធផលធ្វើឲ្យចម្ងាយបើកបរមានមិនដល់ ៤០០ ម៉ាយ។
តបនឹងការលើកឡើងនេះ EPA បាននិយាយថា ៖ “យើងអាចបញ្ជាក់ថា EPA គឺបានធ្វើតេស្តរថយន្តដោយត្រឹមត្រូវ ទ្វារបានបិទ ហើយយើងរីករាយនឹងពិភាក្សាអំពីបញ្ហាបច្ចេកទេសជាមួយ Tesla ដូចដែលយើងធ្វើជាទៀងទាត់ជាមួយក្រុមហ៊ុនផលិតរថយន្តទាំងអស់។”
មកទល់ពេលនេះ គេនៅមិនទាន់ឃើញមានការឆ្លើយតបពីខាង Tesla នៅឡើយទេ ជុំវិញការឆ្លើយតបរបស់ EPA៕
