បើគិតក្នុងរយ:ពេល២៤ម៉ោងចុងក្រោយនេះ នៅក្នុងប្រទេសសិង្ហបុរី មានករណីឆ្លងថ្មី នៃកូវីដ​១៩ ចំនួន១០៣៧នាក់ ធ្វើឲ្យចំនួនអ្នកឆ្លងកូវីដ១៩សរុបនៅក្នុងប្រទេសនេះ កើន​ឡើង​ដល់ ១១១៧៨នាក់ ក្នុងនោះស្លាប់១២នាក់ និងជាសះស្បើយ៨៩៦នាក់។ បើគិតត្រឹម​ពេលនេះ សិង្ហ​បុរី ជាប្រទេស​មានអ្នកឆ្លងកូវីដ១៩ច្រើនជាងគេបំផុត នៅក្នុងតំបន់អាស៊ាន។

យោងតាមវើលដូម៉ែទ័រ បានបង្ហាញតួលេខអ្នកឆ្លងកូវីដ១៩ កាលពីល្ងាច ថ្ងៃទី២៣ ខែមេសា ឆ្នាំ​២០​២០ ថា បណ្ដាប្រទេស​ទាំង១០ នៅក្នុង​តំបន់អាស៊ាន មានអ្នកឆ្លងវីរុសកូវីដ១៩ កើន​ឡើងដល់ ៣៤ ៦២២នាក់ ក្នុងនោះស្លាប់​១២៥៨​នាក់ និងជាសះស្បើយ ៨៨៧៧នាក់។

ប្រទេសក្នុងតំបន់អាស៊ាន មានអ្នកឆ្លងកូវីដ១៩ច្រើន បន្ទាប់ពីសិង្ហបុរី គឺឥណ្ឌូនេស៊ី ដោយ​មាន​អ្នកឆ្លង​វីរុសកូវីដ១៩ ចំនួន៦៩៨១នាក់ ក្នុងនោះស្លាប់​៦៣៥នាក់ និងជាសះស្បើយ ៩១៣​នាក់។ ក្នុងចំណោមប្រទេសទាំង១០ នៅក្នុងតំបន់អាស៊ាន គឺឥណ្ឌនេស៊ី មានអ្នកស្លាប់ដោយកូវីដ១៩ ច្រើនជាងគេ។

ដោយឡែកហ្វីលីពីន ថ្វីបើប្រធានាធិបតី លោក Duterte ចាត់វិធានការយ៉ាងតឹងរ៉ឺង រហូតដល់​​ជនណាម្នាក់ល្មើសនឹងបម្រាមកូវីដ១៩ធ្ងន់ធ្ងរ  អនុញ្ញាតឲ្យប៉ូលិសបាញ់សម្លាប់ចោលក្ដី តែ​ប្រទេសនេះនៅតែមានចំនួនអ្នកស្លាប់ច្រើន នៅក្នុងតំបន់អាស៊ាន បន្ទាប់ពីឥណ្ឌូនេស៊ី។ រហូតមកដល់វេលាខាងលើនេះ ហ្វីលីពីន មានអ្នកឆ្លងកូវីដ១៩ ចំនួន ៦៩៨១នាក់ ក្នុងនោះ​ស្លាប់៤៦២នាក់ និងជាសះស្បើយ៧២២នាក់។

ប្រទេសម៉ាឡេស៊ី កាលពីមុន មានអ្នកឆ្លងច្រើនជាងគេ នៅក្នុង​តំបន់​អាស៊ាន តែ​ឥឡូវបានធ្លាក់មកចំណាត់ថ្នាក់លេខ៤ នៅក្នុងតំបន់នេះ ដោយមានអ្នកឆ្លង ចំនួន​៥៥៣២នាក់ ក្នុងនោះស្លាប់៩៣នាក់ និងជាសះស្បើយ៣៤៥២នាក់។

ថៃមានអ្នកឆ្លង២៨៣៩នាក់ ក្នុងនោះស្លាប់៥០នាក់ និងជាសះស្បើយ​២៤៣០នាក់។ វៀត​ណាម មានអ្នកឆ្លង ២៦៨នាក់ ក្នុងនោះជាសះស្បើយ ចំនួន២២៤នាក់។ ប្រទេស​ប៊្រុយណេ មានអ្នកឆ្លង ១៣៨​នាក់ ក្នុងនោះស្លាប់ម្នាក់ និងជាសះស្បើយ ១១៧នាក់។

ប្រទេសមីយ៉ាន់ម៉ា មានអ្នក​ឆ្លងកើនឡើងដល់១២៧នាក់ ក្នុងនោះស្លាប់៥នាក់ និងជាសះ​ស្បើយ​៩នាក់។ រីឯកម្ពុជា មានអ្នកឆ្លង១២២នាក់ ក្នុងនោះជាសះស្បើយ១១០នាក់។ ចំណែក

ឡាវ មានអ្នក​ឆ្លង ១៩នាក់ ក្នុងនោះជាសះស្បើយ៤នាក់៕ ប្រែសម្រួលដោយ Nuon

from： https://tnaot.com/km/m/detail/article/9158643