អតីតប្រធានាធិបតីប្រេស៊ីល​ លោក​ Lula ​បានចោទប្រកាន់ប្រធានាធិបតីបច្ចុប្បន្ន លោក Bolsonaro កំពុងតែ​«រុញពលរដ្ឋចូលផ្នូរ» ​ដោយសារតែសកម្មភាព​ខ្វះ​ការ​ទទួល​ខុស​ត្រូវ ពាក់ព័ន្ធនឹងយុទ្ធសាស្ត្រប្រឆាំងកូវីដ១៩ ក្នុងប្រទេសនេះ។ នៅពេលនេះ ប្រេស៊ីល មាន​អ្នកស្លាប់ដោយកូវីដ១៩ ជិត​២៤០០នាក់ហើយ តែរដ្ឋាភិបាល​មិនបាន​រឹតបន្តឹង​ការ​ទប់​ស្កាត់នោះឡើយ។

ប្រធានាធិបតីបច្ចុប្បន្ន លោក Bolsonaro បានប្រឆាំងនឹងច្បាប់គម្លាតសង្គម បម្រាមគោចរ​។ មិនតែប៉ុណ្ណោះ លោកតែងតែជួបជុំគ្នា ហើយថែមទំាងដកតំណែងរដ្ឋមន្ត្រីក្រសួងសុខាភិបាល Luiz Mandetta ដែលមានគោលនយោបាយប្រឆាំងនឹងកូវីដ១៩​ ផ្ទុយពីរូបលោក​។ សកម្មភាពខាងលើ ត្រូវបានអតីតប្រធានាធិបតីប្រេស៊ីល លោក Luiz Inacio Lula da Silva ថ្កោលទោសយ៉ាងខ្លាំង​ថា កំពុងតែសម្លាប់ពលរដ្ឋប្រេស៊ីល​។

មិនតែប៉ុណ្ណោះ ប្រធានាធិបតីប្រេស៊ីល ​ Bolsonaro ក៏បានជំរុញ និងចូលរួមដោយផ្ទាល់​ជាមួយពលរដ្ឋ ធ្វើបាតុកម្ម​ប្រឆាំងនឹងច្បាប់ហាមប្រាម។ កន្លងមក លោក​ Bolsonaroតែងតែបង្ហាញសកម្មភាពនៅទីសាធារណៈ ដោយមិនបានពាក់ម៉ាស់ការពារនោះឡើយ។ ជាមួយគ្នានេះដែរ ប្រធានាធិបតីក៏​បានស្នើដល់ពលរដ្ឋ មិនត្រូវ បារម្ភនោះឡើយ ពីការឆ្លងកូវីដ​១៩ គ្រាន់តែការពារ​ថែរក្សាសុខភាព ដូចទៅនឹងជំងឺផ្តាសាយធម្មតាបានហើយ​។ ប្រធានាធិបតី Bolsonaro បញ្ជាក់ទៀតថា គ្មានអ្នកណាអាចរារាំងសេរីភាពចរាចរណ៍​របស់ពលរដ្ឋ​បានឡើយ។

លោក​ Bolsonaro​ បានបញ្ជាក់ទៀតថា អាយុជីវិត គឺមានតម្លៃ មិនអាចកាត់ថ្លៃ​បាន ប៉ុន្តែ​សេដ្ឋកិច្ច​​ត្រូវតែដំណើរការធម្មតា​​ ដើម្បីឲ្យពលរដ្ឋ​មានការងារធ្វើធម្មតា សម្រាប់ចិញ្ចឹមជីវិត​៕ប្រែ​សម្រួល​ដោយ៖ MEO

from： https://tnaot.com/km/m/detail/article/9149536