Sign In 
ចុងសប្តាហ៍កន្លងទៅ យើងសង្កេតឃើញបងប្អូនខ្មែរយើងដែលបានធ្វើដំណើរទៅតាមបណ្តាខេត្តអំឡុងពិធីបុណ្យចូលឆ្នាំប្រពៃណីខ្មែរ កំពុងត្រឡប់មកវិញជាហូរហែរ ដើម្បីបំពេញការងារប្រចាំថ្ងៃរបស់ខ្លួន ពិសេសបងប្អូនកម្មករ កម្មការិនី ដែលបានសុំច្បាប់ទៅកាន់ស្រុកកំណើតជាដើម។
យ៉ាងណា ដើម្បីទប់ស្កាត់ការរីករាតត្បាតវីរុសកូវីស ១៩ នៅទូទាំងប្រទេស រដ្ឋាភិបាលបានដាក់ចេញវិធានការជាបន្តបន្ទាប់ ក្នុងនោះ ការតម្រូវឲ្យបងប្អូនកម្មករ កម្មការិនី ទើបត្រឡប់ពីបណ្តាខេត្តនានា នៅដាក់ដោយឡែក ១៤ថ្ងៃ មុនចូលបម្រើការងារ ក៏ត្រូវធ្វើឡើងទូទាំងប្រទេសដូចគ្នា ដោយទទូលបានការគាំទ្រពីមជ្ឈដ្ឋានសាធារណៈមួយចំនួនធំ។ ជាក់ស្តែងក្នុងនោះ ពលរដ្ឋមួយចំនួន ក៏ដូចជាមន្ត្រីសហជីពកម្មករកម្ពុជា ក៏ចាត់ទុកវិធានការនេះជារឿងត្រឹមត្រូវ។
មន្ទឹមនឹងការគាំទ្រវិធានការរដ្ឋាភិបាល ប្រជាពលរដ្ឋ និងសហជីព ក៏បានច្រានចោលរឿងដែលថា វាជាការរើសអើងចំពោះបងប្អូនទើបត្រឡប់មកពីស្រុកកំណើតនោះទេ ប៉ុន្តែអះអាងជាចូលរួមទប់ស្កាត់ករណីឆ្លងរាលដាលជំងឺកូវីដ ១៩ ទាំងអស់គ្នា។
ជាមួយគ្នានេះ ប្រជាពលរដ្ឋនៅតែមានក្តីព្រួយបារម្ភភ័យខ្លាច ករណីឆ្លងរាលដាលជំងឺកូវីដ គ្រប់ៗគ្នា បើទោះបីជាបច្ចុប្បន្ននេះ ករណីឆ្លងជំងឺ ហាក់មានសភាពស្ងប់ស្ងាត់ក៏ដោយ។
ជាវិធានការណ៍ដើម្បីចូលរួមទប់ស្កាត់ការឆ្លងជំងឺកូវី១៩ ឱ្យកាន់តែមានប្រសិទ្ធភាពថែមទៀតនោះ អ្នករស់នៅទីក្រុង បានស្នើឱ្យអ្នកត្រឡប់មកពីខេត្ត ត្រូវចូលខ្លួនមកបំពេញគោលការណ៍ នៅដាច់ដោយឡែកពីគេរយៈពេល១៤ថ្ងៃ។
បើតាមលោកឃួន តាន់ អនុប្រធានភូមិ៣ នៃសង្កាត់បឹងកេងកេង៣ បានប្រាប់ឱ្យដឹងថា នៅថ្ងៃបុណ្យចូលឆ្នាំ មានប្រជាពលរដ្ឋមួយចំនួន បាននាំគ្នាធ្វើដំណើរទៅស្រុកកំណើត ដែលជាហេតុធ្វើឱ្យអ្នកនៅទីនេះ មានការភ័យខ្លាច អ្នកដែលធ្វើដំណើរចេញក្រៅតំបន់។
លោកបញ្ជាក់ថា៖«អ្នករស់នៅទីនេះផ្សេងទៀត មិនហ៊ានចេញពីក្រៅផ្ទះទេ ព្រោះខ្លាចឆ្លងជំងឺកូវី១៩។ ឥឡូវនេះ ខ្ញុំនិងចុះតាមដាននៅក្នុងភូមិរបស់ខ្ញុំ ថាតើមានមនុស្សប៉ុន្មាននាក់ ដែលត្រឡប់មកពីស្រុកកំណើតវិញ។ នៅពេលស្រង់ទិន្នន័យរួចរាល់អស់ហើយ ខ្ញុំនឹងសរសេររបាយការណ៍ទៅថ្នាក់លើ ដើម្បីស្នើសុំជាវិធានការណ៍ក្នុងរឿងនេះ»។
មិនត្រឹមតែប្រជាពលរដ្ឋរស់នៅតាមលំនៅដ្ឋានក្នុងទីក្រុងទេ ដែលមានការព្រួយបារម្ភក្នុងរឿងនេះ ប៉ុន្តែកម្មករ កម្មការិនី ដែលកំពុងបម្រើការងារនៅក្នុងរោងចក្រ ក៏មានក្តីព្រួយបារម្ភខ្លាចអ្នករួមការងារ ដែលដាក់ច្បាប់ធ្វើដំណើរទៅស្រុកកំណើតដែរ។
បើតាមអ្នកស្រីសាំង ចាន់រី ប្រធានសហជីពមូលដ្ឋានកម្មករនិយោជិត នៃរោងចក្រ W&D បានអំពាវនាវដល់កម្មករនៅក្នុងរោងចក្រ មិនឱ្យមានការរើសអើងចំពោះកម្មករ កម្មការិនី ដែលទើបត្រឡប់មកពីខេត្តឡើយ។
អ្នកស្រីបានបានឱ្យដឹងថា អ្នកត្រឡប់មកពីខេត្ តគួរចូលរួមអនុវត្តនូវគោលការណ៍ ដាក់នៅដោយឡែកពីគេរយៈពេល ១៤ថ្ងៃ។ សម្រាប់គោលការណ៍ដាក់កម្មករឱ្យនៅដាច់ដោយឡែកពីគេ វាមិនមែនបញ្ជាក់ថា កម្មករទាំងអស់នោះ សុទ្ធតែមានឆ្លងមេរោគកូវីដទាំងអស់នោះទេ ប៉ុន្តែនេះគ្រាន់តែជាវិធានការទប់ស្កាត់ មិនឱ្យមានករណីឆ្លងរាលដាលពីមនុស្សម្នាក់ទៅម្នាក់ទៀតប៉ុណ្ណោះ។
អ្នកស្រី ចាន់រី បានបញ្ជាក់ថា៖«ការដាក់កម្មករឱ្យនៅដាច់ដោយឡែកពីគេ វាមិនមែនជាការរើសអើងកម្មករដែលត្រឡប់មកពីស្រុកទេ ប៉ុន្តែអ្នកត្រឡប់មកពីស្រុក គួរតែចូលរួមធ្វើទាំងអស់គ្នា ដើម្បីឱ្យប្រាកដថា ពួកយើងមិនកើតមាននូវជំងឺនេះ»។
សូមបញ្ជាក់ថា មកដល់ពេលនេះ អាជ្ញាធរនៅតាមតំបន់កំពុងអនុវត្តនូវវិធានការ យកអ្នកត្រឡប់មកពីខេត្ត ទុកនៅដាច់ដោយឡែកពីគេរយៈពេល ១៤ថ្ងៃ។ តំបន់ខ្លះបានយកសាលារៀនធ្វើជាកន្លែងទុកអ្នកដំណើរមកពីខេត្ត រីឯតំបន់ខ្លះទៀតបានយកអាគារសួនច្បារ អាគារក្នុងតំបន់សេដ្ឋកិច្ចពិសេស ធ្វើជាកន្លែងសម្រាប់ផ្ទុកអ្នកត្រឡប់មកពីខេត្តវិញ៕ ដោយ៖ ឃួន លក្ខិណា
