ក្រុមចោរប្លន់ប្រដាប់ដោយអាវុធ បានជិះម៉ូតូប្រមាណ១៥០គ្រឿង វាយប្រហារ នៅក្នុងភូមិ ស្ថិតនៅស្រុក Dutsenma, Danmusa និង Safana ហើយបាញ់រះទៅលើពលរដ្ឋ និងដុតផ្ទះ បណ្តលឲ្យពលរដ្ឋ រហូតដល់ទៅ​៤៧នាក់ស្លាប់។

មន្ត្រីសន្តិសុខនីហ្សេរីយ៉ា បានឲ្យដឹង នៅថ្ងៃទី​១៩ ខែមេសាថា ​មានពលរដ្ឋដល់ទៅ​៤៧នាក់បានស្លាប់ ដោយការវាយប្រហារប្លន់ពីក្រុមចោរប្រដាប់អាវុធ នៅក្នុងរដ្ឋ Katsina។ អ្នកនាំពាក្យស្នងការប៉ូលិស ក្នុងតំបន់ លោក​ Gambo Isah ​បានបញ្ជាក់ថា​ កម្លាំងសន្តិសុខ ក៏បានទៅដល់កន្លែងកើតហេតុ ដើម្បីគ្រប់គ្រងស្ថានការណ៍នោះដែរ។

ប្រធានាធិបតី​នីហ្សេរីយ៉ា លោក Muhammadu Buhari បានថ្កោលទោសយ៉ាងខ្លាំង​ដល់ សកម្មភា​ព​វាយប្រហារខាងលើ ។ លោកបានសន្យាថា​នឹងចាត់វិធានការ​តឹងតែងបំផុត ដើម្បីទប់ស្កាត់ការវាយប្រហារទៅលើពលរដ្ឋ។

ភូមិស្រុកជាច្រើន​ នៅក្នុងរដ្ឋ​ Katsina ​តែងតែរងការវាយប្រហារពីក្រុមចោរប្លន់ប្រដាប់អាវុធ។ កាលពីខែកុម្ភៈ​ នៅភូមិ​ Tsauwa និង Dankarក៏រងការវាយប្រហារប្លន់ បណ្តាលឲ្យពលរដ្ឋ​៣០នាក់​ស្លាប់ផងដែរ​៕ ប្រែសម្រួលដោយ៖ MEO

from： https://tnaot.com/km/m/detail/article/9149089