Sign In 
ជំងឺកូវីដ-១៩ អាចអូសទាញសេដ្ឋកិច្ចចក្រភពអង់គ្លេស ធ្លាក់ក្នុងវិបត្តិទ្រង់ទ្រាយធំបំផុត មិនធ្លាប់មានក្នុងរយៈពេល៣០០ឆ្នាំកន្លងមក ហើយប្រាក់បំណុលរបស់រដ្ឋាភិបាលអង់គ្លេស នឹងកើនឡើងជាងសម័យសង្គ្រាមលោកលើកទីពីរទៅទៀត។
បើតាមការប្រកាសរបស់ក្រសួងហិរញ្ញវត្ថុអង់គ្លេស នៅថ្ងៃទី១៥ ខែមេសា បានបញ្ជាក់ថា សេដ្ឋកិច្ចអង់គ្លេស អាចធ្លាក់ចុះដល់ទៅ១៣ភាគរយ ក្នុងឆ្នាំ២០២០ ដោយសារតែការដាក់ប្រទេស ក្នុងគ្រាអាសន្ន ដើម្បីទប់ស្កាត់ការឆ្លងរាលដាល នៃកូវីដ-១៩។ ទាំងនេះជាកម្រិតមួយធ្លាក់ចុះទាបបំផុត មិនធ្លាប់មាន រយៈ៣០០ឆ្នាំកន្លងមក។
បើតាមការិយាល័យទទួលបន្ទុកមូលនិធិអង់គ្លេស OBR បានវាយតម្លៃថា ក្នុងត្រីមាសទី២ នៃឆ្នាំ២០២០ សេដ្ឋកិច្ចអង់គ្លេសធ្លាក់ចុះដល់ទៅ៣៥ភាគរយ។ ជាមួយគ្នានេះ ចំនួនពលរដ្ឋអត់ការងារធ្វើ នឹងកើនឡើងទ្វេដង នៅក្នុងប្រទេសនេះ។
ដោយឡែកក្រុមអ្នកជំនាញ បានលើកឡើងថា សេដ្ឋកិច្ចអង់គ្លេសនឹងល្អប្រសើរឡើងវីញ នៅចុងឆ្នាំ២០២០ ប្រសិនបើការដាក់ប្រទេសក្នុងគ្រាអាសន្ន អាចគ្រប់គ្រងការឆ្លងរាលដាលបាននោះ។
កាលពីថ្ងៃទី១៤ ខែមេសា មូលនិធិរូបិយវត្ថុអន្តរជាតិ IMF បានព្យាករថា សេដ្ឋកិច្ចអង់គ្លេសនឹងធ្លាក់ចុះ៦,៥ភាគរយ ក្នុងឆ្នាំ២០២០។ ប៉ុន្តែនៅក្នុងឆ្នាំ២០២១ សេដ្ឋកិច្ចអង់គ្លេសនឹងងើបឡើងវិញ ប្រហែល៤ភាគរយ។
អង់គ្លេសរងការខាតបង់ដោយមិនបានប្រមូលពន្ធ ចំណែកការចំណាយរបស់រដ្ឋ ក៏កើនឡើងខ្ពស់ ទើបធ្វើឲ្យប្រទេសនេះត្រូវខាតបង់ទឹកប្រាក់ចំណូល រហូតដល់ទៅ ២៧៣ពាន់លានផោន ។
បើតាមគេហទំព័រ Worldometers បានបង្ហាញថា បើគិតមកដល់ថ្ងៃទី១៥ ខែមេសានេះ អង់គ្លេសមានអ្នកឆ្លងកូវីដ១៩កើនឡើងដល់ជាង៩៣ពាន់នាក់ ក្នុងនោះស្លាប់ជាង ១២ពាន់នាក់៕ ប្រែសម្រួលដោយ៖MEO
