Sign In 
ប្រធានាធិបតីរុស្ស៊ី លោក វ៉្លាឌីមៀរ ពូទីន បានបញ្ជាឲ្យក្រសួងការពារជាតិត្រៀមលក្ខណៈបញ្ជូនទាហានចូលរួមក្នុងសង្គ្រាមប្រឆាំងនឹងកូវីដ១៩ ក្នុងប្រទេសនេះ ខណៈវីរុសនេះឆ្លងរាលដាលយ៉ាងឆាប់រហ័ស។
សារព័ត៌មានរ៉យទ័រ នៅថ្ងៃទី១៤ ខែមេសា បានផ្សាយថា លោកប្រធានាធិបតី ពូទីន បានបញ្ជាឲ្យកម្លាំងយោធាត្រៀមលក្ខណៈ ដើម្បីទប់ស្កាត់ការឆ្លងរាលដាលកូវីដ១៩។ ក្នុងរយៈពេល២៤ម៉ោង កន្លងមករុស្ស៊ីមានអ្នកឆ្លងកូវីដថ្មី ដល់ទៅជាង២៥០០នាក់ ធ្វើឲ្យចំនួនអ្នកឆ្លងកើនឡើងដល់ទៅជាង១៨ ៣០០នាក់។ជាមួយគ្នានោះក្នុងមួយថ្ងៃមានអ្នកស្លាប់កើនឡើងដល់ទៅ១៨នាក់ ធ្វើឲ្យអ្នកស្លាប់សរុបក្នុងប្រទេសរុស្ស៊ី កើនឡើងដល់១៤៨នាក់ហើយ។
ទីក្រុងមូស្គូ គឺជាតំបន់ដែលរងគ្រោះខ្លាំងជាងគេ ដោយកូវីដ-១៩។ រដ្ឋាភិបាលបានបិទទីក្រុងនេះដោយហាមពលរដ្ឋចេញក្រៅផ្ទះ។ ការបិទទីក្រុង ក្រោយពេលលោក ពូទីន បានថ្កោលទោសថា មានការយឺតយ៉ាវ ក្នុងសកម្មភាពទប់ស្កាត់ឆ្លងរាលដាលកូវីដ១៩ នៅក្នុងរដ្ឋធានីមូស្គូ។
ជាមួយគ្នានេះ លោក ពូទីន បានរៀបចំគម្រោង ដាក់ពង្រាយកម្លាំងទាហាន ដើម្បីចូលរួមក្នុងសង្គ្រាម ប្រយុទ្ធប្រឆាំងនឹងកូវីដ១៩ ក៏ដូចជា ការរឹតត្បិតលើការធ្វើដំណើររបស់ពលរដ្ឋ នៅក្នុងទីក្រុងផងដែរ៕ ប្រែសម្រួលដោយ៖MEO
