Sign In 
ព្រះតេជគុណជាច្រើនព្រះអង្គ ជំរុញពុទ្ធបរិស័ទចាប់យកព្រះធម៌ និងធ្វើសមាធិ ដើម្បីកុំឱ្យភ័យខ្លាចកូវីដ១៩
ព្រះសង្ឈជាច្រើនអង្គ បានជំរុញឱ្យពុទ្ធបរិស័ទ ចាប់យកព្រះធម៌ និងធ្វើសមាធិ អាចជំនួយក្នុងការរក្សាផ្លូវចិត្តឱ្យស្ងប់ ចៀសឆ្ងាយពីការភ័យខ្លាចអំឡុងពេលពិភពលោកកំពុងប្រឈមមុខនឹងវិបត្តិជំងឺកូវីដ១៩។ នេះបើតាមថេរដីកា នៃព្រះតេជគុណជាច្រើនអង្គ គង់ក្នុងវត្តអារាម នៅរាជធានីភ្នំពេញ។
ព្រះសតិបាលោ ភិក្ខុ សុខ សុផៃ គង់នៅវត្តគល់ទទឹងបានមានព្រះថេរដីកាថា ប៉ុន្មានខែចុងក្រោយនេះ ព្រះតេជគុណបានមើលឃើញពីការភិតភ័យ ដោយសតិអារម្មណ៍របស់ពុទ្ធបរិស័ទ ទៅលើជំងឺកូវិដ១៩ ដែលនាំពុទ្ធបរិស័ទ នាំគ្នាត្រៀមស្បៀង និងទិញសម្ភារៈប្រើប្រាស់ រួមទាំងគ្រឿងបរិភោគមកទុកនៅក្នុងផ្ទះផងដែរ។
ព្រះតេជគុណ ភិក្ខុ សុខ សុផៃ មានថេរដីកាដែរថា “អាការភ័យហ្នឹង ក៏ជាបញ្ហាមួយដែរ ពិព្រោះតាមទ្រឹស្តីព្រះពុទ្ធ បានចែងថា អាជំងឺដែលកើតពីចិត្តហ្នឹង វាខ្លាំងជាងអាជំងឺដែលកើតលើផ្លូវកាយ អញ្ចឹងបើកាលណាវា កើតតិចតួចហើយ វាមានអាគំនិតភ័យខ្លាចនៅក្នុងចិត្តហ្នឹង វាធ្វើឱ្យយើងឆាប់បាក់ទឹកចិត្តលឿនណាស់ មានន័យថា ពេលខ្លះធ្វើអ្វីអត់កើត ភ័យស្លន់ស្លោរ ដោយសារជំងឺតិតតួច វាធ្វើឱ្យយើងមានគំនិតភ័យ អាចជាឱកាសធ្វើឱ្យជំងឺផ្សេងទៀតចូលប្រៀតខ្លួនក៏មានដែរ”។
គោលការណ៍សំខាន់របស់ព្រះពុទ្ធសាសនា គឺការទូន្មានឱ្យមនុស្សមានការអប់រំចិត្តរបស់ខ្លួនឱ្យស្ងប់ ពិសេសគឺការតាំងចិត្ត ភាវនាធម៌ ដើម្បីទប់ស្កាត់នូវភាពភ័យខ្លាច។
ព្រះវីរៈបញ្ញាញាណ ថៃ ប៊ុនធឿន ព្រះគ្រូចៅអធិការ វត្តស្ទឹងមានជ័យ ក៏មានថេរដីកាដែរថា “ប្រជាពលរដ្ឋគួរនាំគ្នាស្តាប់ព្រះធម៌ឱ្យបានច្រើន ដើម្បីអប់រំចិត្តឱ្យស្ងប់ ព្រោះការស្តាប់ធម៌អាចជួយ ឱ្យអារម្មណ៍ជ្រះថ្លា និងមិនគិតទៅលើទុក្ខព្រួយ វាក៏អាចកាត់បន្ថយដែរ។ កាលណាបើអស់លោកមានធម៌ មន្ត្រីរាជការមានធម៌ ប្រជាពលរដ្ឋក៏មានធម៌ សង្គមទាំងមូលក៏មានធម៌ នោះនឹងឈ្នះ ទៅលើ ឧបទ្រុបចង្រៃ ជាពិសេសគឺកូវីដ១៩ បាន”។
ជាមួយគ្នានេះបើតាមព្រះតេជគុណបណ្ឌិត សុខ ប៊ុនធឿន ព្រះចៅអធិការវត្តនន្ទមុន្នី ក៏បានលើកឡើងពីការប្រតិបត្តិនូវវិន័យធម៌ ដើម្បីឱ្យពុទ្ធសាសនិកជនទទួលបានសុខភាពទាំងផ្លូវការ និងផ្លូវចិត្ត។
បើតាមព្រះសុមេធវង្សបណ្ឌិត សុខ ប៊ុនធឿន ព្រះចៅអធិការវត្តនន្ទមុន្នី បានមាន ព្រះថេរដីកាថា “យោងទៅតាមពុទ្ធដីកា ព្រះពុទ្ធលោកបានត្រាស់ដឹងឡើង ព្រះអង្គគិតខ្លាំងមែនទែនចំពោះ សុខភាពពុទ្ធបរិស័ទ ឬក៏មនុស្សជាតិទូទៅតែម្តង ហើយសុខភាពតាមបែបព្រះពុទ្ធសាសនា ព្រះពុទ្ធលោកសម្តែងមកមានពីរ ទី១ សុខភាពផ្លូវកាយហើយ ទី២ សុខភាពផ្លូវចិត្ត។ សុខភាពផ្លូវកាយ ហ្នឹងដើម្បីឱ្យកាយយើងមានសុខភាពល្អ គឺត្រូវតែមានការប្រើប្រាស់បច្ឆ័យ៤ ប្រកបដោយភាពអនាម័យ តាំងពីគ្រឿងស្លៀកពាក់ តាំងពីបាយ ទឹក តាំងពីទីកន្លែងជ្រកកោនស្នាក់នៅក្តី រហូតដល់ថ្នាំសម្លាប់កែរោគហ្នឹងឯង។ ទី២ សុខភាពល្អផ្លូវចិត្ត គឺមានការគោរពបដិបត្រតាមវិន័យព្រះពុទ្ធសាសនា កាលណាបើជីវិតយើងមានសុខភាពល្អហ្នឹង ព្រះថាជាលាភរបស់យើង ជាសុភមង្គលសម្រាប់ជីវិតរបស់យើង។
យោងតាមសេចក្តីប្រកាសរបស់ក្រសួងសុខាភិបាល ការជួបជុំបែបសាសនា ទាំងអស់នៅទូទាំងប្រទេស នឹងត្រូវផ្អាកជាបណ្តោះអាសន្ន ដើម្បីចូលរួមទប់ស្កាត់វីរុសកូវីដ ១៩ ប៉ុន្តែបណ្តាវត្តទូទាំងប្រទេស នៅតែបើកទទួលទេយ្យទានពីពុទ្ធបរិស័ទដូចសសព្វរាល់ដង គ្រាន់តែទីអារាមបានរៀបចំរក្សាអនាម័យ គម្លាតសង្គម និងវិធានការផ្សេងទៀត ចូលរួមទប់ស្កាត់ការរីករាលដាលជំងឺកូវីដ ១៩ នេះ៕ ដោយ៖ ឃួន លក្ខិណា
