បណ្តាញផ្សព្វផ្សាយពសង្គម​ដ៏ធំ​ មូលដ្ឋាននៅក្នុងប្រទេសចិន TikTok បានប្រកាស​ផ្តល់​កញ្ចប់​ទឹកប្រាក់​២៥០​លានដុល្លារ​ ដើម្បីជួយគាំទ្រ​ដល់​ខ្សែត្រៀម​ជួរមុខ ​ដូចជា​កម្មករ, អ្នកសិក្សា​អប់រំ និងសហគមន៍​នៅក្នុងតំបន់​ទាំងឡាយ ​ដែលរងនូវវិបត្តិ​ដោយសារវីរុស COVID-19 ។ 

ប្រភព IOL ផ្សាយថ្ងៃទី១០ ខែមេសាថា ក្រុមហ៊ុនផ្សព្វផ្សាយសង្គម អែបវីដេអូខ្លីៗ TikTokនេះ ក៏នៅ​បានកំណត់ដោយឡែក​បន្ថែម​ទៀតទឹកប្រាក់​១០០លានដុល្លារ ​នៅក្នុង​ឥណទានផ្សព្វផ្សាយពាណិជ្ជកម្ម​ចំពោះ​អាជីវកម្ម​ទាំងឡាយ​ ដែល​​ស្វែងរកការផ្សព្វផ្សាយ​ពាណិជ្ជ​កម្ម​ដើម្បី​ឲ្យអាជីវកម្ម​របស់ខ្លួន​បានប្រសើរឡើងវិញ ។ 

អង្គការសុខភាពសាធារណៈ ដូចជាមជ្ឈមណ្ឌល​គ្រប់គ្រងជំងឺ (CDC) និងអង្គការសុខភាពពិភពលោក (WHO) ក៏ទទួលបាន​នូវ​ឥណទានផ្សព្វផ្សាយពាណិជ្ជកម្ម​​១៥លានដុល្លារ និង​១០លានដុល្លារផងដែរ ក្នុងអង្គការនីមួយៗ ។ 

មូលនិធិ CDC បានប្រកាសនៅលើ​បណ្តាញ tweet កាលពីថ្ងៃទី​៩ ខែមេសា ឆ្នាំ២០២០ថា ខ្លួនពិតជា«អរគុណខ្លាំងណាស់»ចំពោះការបរិច្ចាគ​របស់​ក្រុមហ៊ុនបណ្តាញផ្សព្វផ្សាយ​សង្គម TikTok​នេះ ។

បណ្តាញផ្សព្វផ្សាយ​សង្គម​TikTok​នេះ កាលពី​មុន​គឺជាដៃគូ​របស់​អង្គការសុខភាពពិភពលោក ដោយបាន​ផលិត​កម្មវិធីផ្សាយបន្តផ្ទាល់អប់រំ​​​លើវិស័យសុខភាពសាធារណៈ និងវិទ្យាសាស្ត្រ​​ ដោយបញ្ចូលសំឡេង​ដ៏ល្បីល្បាញ់​របស់ពិធីករ​អាមេរិក Bill Nye គឺ​កម្មវិធីឈ្មោះ «យុវជនវិទ្យាសាស្ត្រ»។

ក្រុមហ៊ុន TikTok បានបញ្ជាក់ផងដែរថា ខ្លួនបាននិងកំពុងធ្វើការជាមួយដៃគូ​ដើម្បីចែកចាយម៉ាស និង​បរិក្ខារការពារខ្លួនដទៃផ្សេងទៀត​ដល់មន្ទីរពេទ្យ​នៅប្រទេស​ដែលរង​គ្រោះបំផុត ដូចជាអ៊ីតាលី, កូរ៉េខាងត្បូង និងសហរដ្ឋអាមេរិក​ជាដើម ។ 

លោក Alex Zhu អគ្គនាយកក្រុមហ៊ុន​ផ្សព្វផ្សាយសង្គម TikTok បានថ្លែងការណ៍ថា «យើងយល់ច្បាស់អំពីពេលវេលា​ដ៏លំបាក​ទាំងនេះ​ចំពោះអ្នកគ្រប់គ្នា ។ យើង​បានបន្ត​ផ្តល់ជូន​ឲ្យបានច្រើន​បំផុត​​ដែលអាចធ្វើទៅបាន​ដើម្បីជួយជាសប្បុរសធម៌» ។ 

គួរបញ្ជាក់ថា បណ្តាញផ្សព្វផ្សាយសង្គម TikTok បានបង្កើតឡើង​នៅក្នុងឆ្នាំ២០១៦ ។ នៅឆ្នាំ២០១៩ បណ្តាញសង្គម​មួយនេះ​បានក្លាយជា App ដែលមានការគេដោនឡូត​បំផុត​ទី៧​​នៅក្នុងទសវត្សរ៍ ។ នេះបើតាម​គេហទំព័រ​បច្ចេកវិទ្យា CNET ៕ ប្រែសម្រួលដោយ៖ thach yat

from： https://tnaot.com/km/m/detail/article/9120519