ប្រធានរដ្ឋសភាអ៊ីរ៉ង់ លោក Ali Larijani បានធ្វើតេស្តវិជ្ជមានសម្រាប់កូវីដ-១៩ ។ សារព័ត៌មានអ៊ីរ៉ង់​ IRNA ​បានផ្សាយថា ក្រោយពេលប្រធានរដ្ឋសភា មានសុខភាពខុសប្រក្រតី ទើបលោកសម្រេចទៅធ្វើតេស្ត ហើយលទ្ធផលវិជ្ជមាន នៃកូវីដ-១៩។ ប៉ុន្ដែរហូតមកដល់ពេលនេះ លោកត្រូវបានដាក់ឲ្យនៅដាច់ដោយឡែក ដើម្បីព្យបាល​។

ទោះជាយ៉ាងណា មកទល់ពេលនេះ​ ប្រធានរដ្ឋសភាអ៊ីរ៉ង់ បានក្លាយជាមន្ត្រីជាន់ខ្ពស់បង្អស់របស់អ៊ីរ៉ង់ បានឆ្លងកូវីដ-១៩ ក្នុងរយៈពេលជាច្រើនសប្តាហ៍ចុងក្រោយនេះ។ កាលពីសប្តាហ៍កន្លងមក លោក​ Ali Larijani បានលើកឡើងថា អ៊ីរ៉ង់អាចទប់ស្កាត់កូវីដ-១៩បានយ៉ាងល្អប្រសើរជាងប្រទេសជាច្រើនទៀត ​នៅលើពិភពលោក​។

លោក​ Ali Larijani បញ្ជាក់ថា «ដោយសារតែមានយុទ្ធសាស្ត្រ​ល្អរបស់ក្រសួងសុខាភិបាល និងកម្លាំង​ប្រដាប់អាវុធ ទើបអ៊ីរ៉ង់អាចគ្រប់គ្រងបានស្ថានភាព នៃការឆ្លងរាលដាលកូវីដ-១៩ បានយ៉ាង​ល្អប្រសើរជាង​ប្រទេស​ជាច្រើន ក្នុងតំបន់​ និងលើពិភពលោក​។

តាមតួលេខថ្មីបំផុត ​បានបង្ហាញឲ្យឃើញថា អ៊ីរ៉ង់​មានករណីឆ្លងកូវីដ-១៩ ជាង​៥ម៉ឺននាក់ ក្នុងនោះស្លាប់ជាង​៣ពាន់នាក់​។ អ៊ីរ៉ង់​ជាប្រទេសមានករណីឆ្លង និងស្លាប់មុនគេ នៅក្នុងតំបន់មជ្ឈិមបូព៌ា និងអ៊ីរ៉ុប។ ប៉ុន្តែដោយ​សារមានការជួយអន្តរាគមន៍ពីរុស្ស៊ី និងចិន ទើបអ៊ីរ៉ង់អាចទប់ស្កាត់ស្ថានភាពឆ្លងរាលដាលយ៉ាងល្អប្រសើរបំផុត​។ ជាមួយគ្នានេះដែរ អ្នកជំងឺជាសះស្បើយក៏បានកើនឡើង រហូតដល់១៦ ៧០០នាក់ហើយ៕ ប្រែ​សម្រួល​ដោយ៖ MEO

from： https://tnaot.com/km/m/detail/article/9099468