Sign In 
កម្លាំងសមត្ថកិច្ច គ្រោងបញ្ជូនជនសង្ស័យម្នាក់ ទៅកាន់តុលាការសាលាដំបូងខេត្តតាកែវ ពាក់ព័ន្ធនឹងសំណុំរឿង យកពូថៅកាប់ម្តាយបង្កើតរបស់ខ្លួន បណ្តាលឱ្យស្លាប់បាត់បង់ជីវិត។
ហេតុការណ៍នេះ បានកើតឡើងកាលពីវេលាម៉ោង៣ និង៥០នាទី ថ្ងៃទី៧ ខែសីហា ឆ្នាំ២០២០ នៅភូមិព្រែឈើទាល លើឃុំអង្គរតាសោម ស្រុកត្រាំកក់ ខេត្តតាកែវ ។
បើតាមលោកវរសេនីយ៍ឯកឌុក ធីយ៉ា អធិការនគរបាលស្រាំកក់ បានឱ្យដឹងថា ជនរងគ្រោះឈ្មោះ ប៊ុត ខាន់ ណារ៉េត ភេទស្រី អាយុ៥៩ឆ្នាំ ត្រូវជាម្តាយរបស់ជនសង្ស័យឈ្មោះ ជន បូណាត ភេទប្រុស អាយុ៣៤ឆ្នាំ។ អ្នកទាំងពីររស់នៅក្នុងតំបន់កើតហេតុខាងលើ។
បើតាមរបាយការណ៍ពីសមត្ថកិច្ចបានឱ្យដឹងថា ជនសង្ស័យ ជាមនុស្សមិនគ្រប់ទឹក តែងតែរករឿង និងវាយបំផ្លាញទ្រព្យសម្បត្តិ នៅក្នុងផ្ទះជាញឹកញាប់។
មុនពេលកើតហេតុ ជនសង្ស័យ បានយកពូថៅនឹងកាំបិតធ្វើសកម្មភាព កាប់ក្បាលស្ត្រីជាម្តាយរបស់ខ្លួន មួយពូថៅចំក្បាលពីលើផ្នែកខាងឆ្វេង ដាច់ប្រវែង ៨ សង់ទីម៉ែត្រ ជំរៅចូលក្នុងផុងដល់លលាដ៍ បណ្ដាលឲ្យស្លាប់តាមផ្លូវ នៅពេលដឹកតាមរថយន្តទៅសង្គ្រោះនៅមន្ទីរពេទ្យ។
ជនសង្ស័យខាងលើ ត្រូវបាននគរបាលស្រុកត្រាំកក់ ធ្វើការឃាត់ខ្លួន ក្រោយពេលជនសង្ស័យបានធ្វើសកម្មភាពសម្លាប់ម្តាយរបស់ខ្លួន។
រហូតមកដល់ពេលនេះ ជនសង្ស័យត្រូវបានឃុំខ្លួន នៅការិយាល័យព្រហ្មទណ្ទខេត្ត ដើម្បីកសាងសំណុំរឿងបញ្ជូនទៅតុលាការ កាត់ទោសតាមច្បាប់៕ ដោយ៖ត្នោត
