Sign In 
ប្រជាពលរដ្ឋនៅក្នុងខេត្តព្រះវិហារ បានជូនដំណឹងទៅដល់អាជ្ញាធរជំនាញខាងមន្ទីរវប្បធម៌ និងនគរបាលបេតិកភណ្ឌក្រោយខ្លួនជីកប៉ះវត្ថុបុរាណ២ដុំក្នុងដីចម្ការរបស់ខ្លួន។
ទីតាំងដែលជីកប៉ះស្ថិតនៅក្នុងភូមិខ្នារថ្មី ឃុំរណសិរ្ស ស្រុកសង្គមថ្មី ខេត្តព្រះវិហារ ដែលមានចម្ងាយពីប្រាសាទព្រះខ័នកំពង់ស្វាយ ប្រហែល ១០ គីឡូម៉ែត្រ។ ក្រោយការជូនដំណឹង ក្រុមអភិរក្សប្រាសាទព្រះខ័នរួមសហការជាមួយនគរបាលបេតិកភណ្ឌបានចុះពិនិត្យមុននេះនៅទីតាំងខាងលើដើម្បីស្រាវជ្រាវ និងចាត់វិធានការបន្ត។
រូបបដិមាករដែលពលរដ្ឋជីកប៉ះពេលធ្វើចម្ការស្ថិតនៅក្នុងជម្រៅ២ម៉ែត្រទៅក្នុងដី និងមានចំនួន២ផ្ទាំង។ ផ្ទាំងទីមួយគឺជាចម្លាក់ព្រះពុទ្ធប្រក់នាគស្ថិតក្នុងរចនាបថបាយ័ន ឬក្រោយអង្គរ (?) និងមួយផ្ទាំងទៀតទំនងជាចម្លាក់ទ្វារបាល ឬទេពអ្វីមួយមិនច្បាស់ត្រូវរង់ចាំមន្ត្រីជំនាញធ្វើការបកស្រាយ។
នេះគឺជាលើកទី៤ហើយក្នុងរយៈពេលប៉ុន្មានខែចុងក្រោយដែលគេប្រទះឃើញចម្លាក់បុរាណខ្មែរកប់នៅក្នុងដី។ ដំបូងគេគឺតោថ្មនៃប្រាសាទមេបុណ្យ ស្ថិតក្នុងក្រុមប្រាសាទបន្ទាយឆ្មារ, ទី២គឺបដិមាព្រះពុទ្ធជាច្រើនអង្គជីកឃើញនៅអង្គរវត្ត, ទី៣គឺរូបសំណាកសត្វអណ្ដើកនៅស្រះស្រង់៕ អត្ថបទ៖ ចិត្រា
